Ek geniet nou so baie die letter van die alfabet tema, dat ek sommer oor die naweek nog k-klankie aktiwiteite gedoen het, ek kan myself nie keer nie! 🙂
Ek het my kinders die basiese beginsels van krieket geleer. Ek het gekolf, Ilani het geboul en Janéy was die veldwerker. Klein Tenike het aangekyk met koue appel in die hand. Ek het ‘n hele paar lopies aangeteken voor Janéy my uitgekry het, maar ander sus wou nie hê mamma moes uit wees nie, sy kry my te jammer. Janéy het die op en af hardloop in elk geval geniet so toe bly ons maar in daardie posisies. Dit was lekker pret!
‘n Baie oulike alfabet boek is ‘n Annerste ABC-boek vir aspatatte deur Maritha Snyman. Die kinders leer goeie woordeskat aan terwyl hulle na pragtige prente kyk. Die K-rympie is soos volg:
Krokodil kielie sy kitaar
En Koedoe pluk aan ‘n enkel-snaar.
Skril klink die klank uit Kanarie se keel.
Dalk moet sy eerder leer blokfluit speel.
Ek het ook die baie oulike storie van Krisjan die Kameelperd vertel in die boek ‘Kameelperde kan nie dans nie’ deur Giles Andreae. Daar is klomp goeie k-woorde tussendeur die storie, bv knopperige knieë, knibbel en knak. Ek dink die skrywer was juis uit om so veel moontlik k’s in te sit!
Klere knip van felt is nog ‘n k-aktiwiteit. Ek sou graag meer tyd wou spandeer aan klere maak vir ons feltpoppe. Dalk kan ons nog meer kreatief raak en kraletjies vaswerk aan rokkies. Maar vir nou het ons mannetjie ‘n jas en das.
En toe moes ons Katjie maskers maak! Sommer van papier borde en eierhouers.
Ons katjies se ore was van oranje karton gesny so die katties word toe ook oranje- amper rooi (bietjie kwaai katjies hierdie).
Om ons ander k-aktiwiteite te sien, gaan hier.
Ek sal nou ongelukkig die k-klankie moet koebaai sê vir ‘n rukkie, ons moet nou eers aangaan met A. 😃
[…] Nog K Aktiwiteite […]