Skep die Atmosfeer vir Leer

My kinders se tennis coach het die artikel geïnspireer. Hy vertel my vanoggend dat hy iets opgelet het van die tuisskool kinders wat hy tennislesse voor gee. Hy sê gewoonlik leer kinders deur een van drie metodes: visueel, ouditief of kinesteties. Maar hy kom agter dat tuisskolers ’n ekstra metode het, naamlik ‘Educational’. Hy sê dat hy dit nou getoets het met my girls en dit werk!

Tennis het baie teorie wat afrigters gewoonlik nie vir hulle leerlinge leer nie omdat dit, glo, moontlik bo hulle vuurmaakplek is. ‘Coach’, soos my kinders hom noem, verduidelik dat skoolkinders (waarvan sy eie drie kinders ingesluit is), baie het om aan te dink. Dinge soos huiswerk en take, vriende en groepsdruk. Daar is bekommernisse wat ‘head space’ opneem. Dus, is daar nie spasie vir te veel nuwe inligting nie. Ek voeg die ‘te’ by maar mens kan lank debatteer oor hoeveel inligting kinders wel kan inneem.

Coach sê dat hy sien dat die rustige, liefdevolle atmosfeer waarin tuisskolers grootword, plek los vir hulle om op tennislesse en effe ingewikkelde teorie te kan hoor en verstaan. Daar is nie klomp buite goed wat soos rookmis om baie kinders se koppe hang nie.

En ek wil oor die atmosfeer van leer praat. Ek wil nie kinders wat skool toe gaan, of hulle ouers, kap nie. My doel is om tuisskool gesinne te bemoedig. Om die voordele van julle leefstyl keuse ten volle te benut!

Die gebrek aan sosialisering is gewoonlik die eerste kritiek wat tuisskolers kry. Maar ek wil wys hoe dit eintlik ’n voordeel is. Jy as ouer kan nou jou kind se maatjies kies. Jy kan inspraak lewer tot enige gedrag by ‘n kuier waarmee jy nie saamstem nie. Jy kan maats uitsoek wat dieselfde waardes as julle gesin deel. Jy kan jou kinders toelaat om met ouer of jonger kinders te speel.

Ter voorbeeld, ons het ‘n pragtige baba seuntjie wat nou elke dag by ons kuier. Ons Brenda-helper se nuwe seun, Denzel. Sy baba geluide helder ons huis op en my kinders het die baba boetie waarvoor ons almal gesmag het. Die liefde en vreugde wat hier uitgedeel word verryk ons gesin! Ek sê vir Brenda, dat haar baba nie ‘n te kort het aan stimulasie en vrolike gesiggies om na te kyk nie. My dogters pomp sy beentjies en laat hom ‘staan’ en skop. En as hy vir jou glimlag, voel jy of jy die boerpot gewen het! Die reëling dat hy saam Brenda werk toe kom is goed vir hom en dis goed vir my kinders.

Ilani met Denzel

Dit vorm deel van die rustige, gelukkige atmosfeer wat my kinders in grootword.

Die ander ding is speel. Speel sonder onderbrekings. Speel sonder politiek (gewild teenoor ongewild) of leiers of bendes of oordeling nie. My 12-jarige vra die ander dag of sy te oud is om met poppe te speel. Ek antwoord: “vir seker nie”! En nou stap sy en 9-jarige sussie elke dag af in die straat met hulle baba’s in waentjies. Dis die oulikste ding! Ek moes dit afneem:

Daaglikse stap.

So, daar is soveel vryheid dat daardie boompie lekker kan uitsprei en woes groei! Die bemoediging en ondersteuning van mamma-juffrou is soos water wat uitgegiet word oor daardie tuisskool kindjie. Daar is minder onsekerheid en selftwyfel.

Dis nie te sê dat tuisskolers nie stres het nie. Tuisskool huwelike het steeds uitdagings. Daars steeds finansiële stressors of siekte in die familie of die afsterwe van ‘n geliefde troeteldier om te verwerk. Daar sal vir seker ook vrese en moeilike emosies wees om tuisskolers se emosionele stamina te toets.

Maar, tuisskool ouers, benut die vreugde van julle eie huis en leer omgewing! Jou kinders is in hulle veilige bubble en dit doen hulle goed! Hulle kan fokus aan leerwerk en moeilike konsepte en nuwe woorde en konsentreer op net die werk wat voor hulle is. Minder eksterne sake besoedel hulle kapasiteit. En dis nóg ‘n voorreg van tuisskool!

 

 

 

 

By |2022-05-12T19:42:38+00:00May 12, 2022|Uncategorized|0 Comments

My toring van Babel.

Hierdie artikel gaan nie oor tuisskool nie. Dit gaan oor my geestelike journey. Ek wil daaroor skryf.

Ek was van vroeg af wat ander sal noem: ‘n goeie Christen. Ek het eers onlangs besef dat ek ‘n toring soos die een van Babel gebou het. Elke baksteen was ‘n goeie daad of indrukwekkende Christen prestasie. Ek sien dit nou raak.

My ouers sê ek het my lewe vir die Here gegee op die ouderdom van 3 jaar oud! Ek het Jesus genooi om in my hart te kom woon. En toe op 4 was ek gedoop. Ek het fotos daarvan. Die pastoor oom het gevra watse liedjie kan hy op sy kitaar vir my speel en sing soos ek in die swembad gedoop word. Ek onthou ek het die een van Kids Praise gekies: ‘I wanna be Lord, just like you! All the good things that I want to do… listen to my heart Lord, yes it’s true..’ Sjoe, vir meeste van my lewe, was daardie my tema liedjie. Dis ‘n baie mooi liedjie!

Daars niks fout met kinders wat vroeg en opreg hulle hartjies aan Jesus toewy nie. Ook niks fout met jong kinders wat graag gedoop wil word nie. Maar ongelukkig, word so iets soms, soos in my geval, maklik ‘n punt op my telbord, ‘n veer in my hoed, ‘n baksteen in my toring.

Ek bou sodat ek nader aan die Here kan wees. Ek bou om die Christen leer te klim. Hoe hoër, hoe heiliger. Hoe hoër, hoe beter! Of so, het ek geglo.

Ek het gekies om na ‘n Christen skool toe te gaan. Ek het daar die Bybel voor en agter geleer ken. Ek kon die vinnigste in my klas na die regte plek in die Bybel toe blaai. Ek kan nie vir julle sê hoe trots het dit my laat voel nie! Net Graad 2, en ek kon Habakkuk 2:16 of Maleagi 4:21 vind. En ons moes verse memoriseer. En opsê. En vir mense bid. En woorde kry vir juffrouens. Ons het selfs pryse aan die einde van die jaar gekry vir Vrug van die Gees! Ja! Sertifikate voor die hele skool en kerk vir goeie Christen karakter! Sjoe! En ek het daardie toekennings nagejaag.

Dit laat my dink aan Max Lucado se kinderboek ‘Ek is spesiaal’. Ek het baie sterre versamel oor wat mense van my sê. Onnies en die skooolhoof en pastoor het almal vir my sterretjies gegee. “Sy is ‘n goeie Christen!” En dan sal my skoolklasmaats al my sterre sien en dink: “Sy het so baie sterre, sy moet goed wees. Wens ek kon so baie sterre kry as sy.” Ek weet hiervan want jare daarna, het een mamma met my gedeel hoe haar seun op skool gehuil het dat hy nie God se stem kon hoor nie. Hy het gesê dat hy moedeloos voel want net Janet kan God se stem hoor. Toe die ma dit met my deel, voel ek die hartseer in haar storie. Ons het geglimlag en gegiggel daaroor. Maar onderliggend was daar ‘n gevoel van tragedie.

Here, kom breek my toring.

C.S Lewis beskryf die berg wat Christene klim. En die wat hoër is, kyk neer op die wat nog onder is. Dis mos hoe ek geredeneer het: sekerlik ek wat die hele Bybel in een jaar gelees het… is wat? Nader aan die Here? Beter toegerus om Hom te dien? Vir seker ‘n beter Christen as die dwelm verslaafde wat sopas bely het. Maar ek besef nou, ek is gered omdat Jesus vir my gesterf het, presies soos vir daai druggie. Ek kan nie beter wees as ‘n ander Christen nie, want ons het dieselfde Redder.

En dan het ek goed begin versamel. Want Christene moet ook gawes van die gees hê. Profesie is die beste. Ek was by konferensies en seminare om die gawe te leer en te oefen. Maar, ons kan nie dit self verwerk nie, dit word aan ons geskenk. Maar ons kan daarvoor vra. En dan oefen om dit te gebruik deur om woorde te kry vir mense. En as die woorde akkuraat is, dan weet jy, jy het dit! Ek was op ‘n missie om woorde te kry vir mense. Dalk ‘n teksvers. Dalk ‘n visie. “Here, gee my ‘n woord sodat ek mense kan seën. Wat wil U vir die persoon sê?” Ek weet die Here het my soms in my onkunde, en opregte begeerte, gebruik. Hy werk deur ons, onperfek soos ons is. Ek is so dankbaar daarvoor! Want ons almal wil Hom so graag behaag! Maar, wat ek nie geweet het nie is: ek was klaar goed genoeg. Ek het reeds sy goedheid en guns verkry! Deur Jesus.

Ek is nou opnuut deurmekaar oor die spreek in tale ding. Dis ‘n geskenk maar jy kan leer om dit te gebruik. Lyk my almal kan die geskenk kry. Die taal van die Heilige Gees. Dis vir almal bedoel. En so, ons staan in ‘n ry en probeer praat soos die geestelike persoon op die mikrofoon. Ek wonder of die Here vir my gelag het. Nee, Hy sou seker nie.

Jy mag maar vir my lag Here.

Moes nogals komies gewees het hoe ek probeer in tale praat. Hoe ek dink ek doen. Al die jare. Tot my peuter ook soos ek in tale praat. Maar dis haar nonsens woordjies. Dis baba taal. En myne was ook. Nie deur die Heilige Gees gegenereer of inspireer nie. Ek dog dis hoe dit werk. Klink vir my of almal net so paar woorde oor en oor sê. Niemand hoef te weet wat dit beteken nie. Tot ek iemand ontmoet het wat sê dit klink elke keer anders. En hy dink nie daaraan nie. Dit kom spontaan uit sy mond. En dan gee die Here vir hom ook die uitleg. Wow! O! Bloosgesiggie maal ‘n duisend keer!

Maar dis okay. Dis ‘n baksteen uit my toring wat moes val.

En op ‘n dag, kom daar ‘n hele paar verdiepings afgetuimel. Toe ek vir ‘n swanger mamma bid en ‘n mooi woord gee oor haar baba seuntjie. Ek het so heilig gevoel! So bly dat ek vir haar so woord van die Here kon gee. Jy sien, ek is ‘in tune’ met die Here. Dis wat my gesig gestraal het. Toe is daardie baba stilgebore. En ek struikel oor klomp bakstene wat in my pad nou lê. Huh?! Die Here maak mos nie foute nie. Hy het dan gesê die kind het ‘n blink toekoms! Dalk blink in die hemel! Ek moes verkeerd gehoor het. Nie net verkeerd nie. Sommer eintlik nie sy stem gehoor het nie. Net als self opgemaak, om goed te lyk. Eish! Toe nie so ‘in-tune’ soos ek gedink het ek is nie. Dat ek daardie ma kon hoop en woord gee vir haar baba, net om hom te verloor, breek my! En ek sien nou, daardie breek was/is nodig.

Want toe die stof en rommel van my toring gaan lê het, sien ek die heerlikheid van die Here se genade. Ek kon nie nader aan Hom wees as wat ek reeds was nie! Hy het afgekom tot my toe! Ek bou verniet ‘n toring na Hom!

Al die goed wat ek gedoen het, het my laat dink dat ek geregtig is. Geregtig om God se vriend te wees! Geregtig om een van sy gunstelinge te wees. Geregtig na sy beskerming. Dit wat ek doen MOES Hom beïndruk het! Behaag het. Dat Hy oor my lewe en my dade sou glimlag. Dat Hy wel behae in my sou vind.

Maar dis als skynheiligheid. Selfregverdig. Eiegeregtigheid.

God het ons nie meer lief as ons reg lewe nie. Ek kan nie sy liefde koop met my goeie werke nie.

My nuwe tema liedjie se eerste vers gaan so: “I’ll never be more loved than I am right now
Wasn’t holding You up
So there’s nothing I can do to let You down
It doesn’t take a trophy to make You proud
I’ll never be more loved than I am right now” ‘Jireh’ geskryf deur Chandler Moore.

Hehe, elke keer as ek probeer ‘n foto van myself oplaai tot die artikel, glitch die app. Dit gooi my foto weer uit. Maar die foto van die toring van Babel werk eerste keer. So, die Here praat darem nog met my.

#lessofme #allofyou

By |2022-05-03T05:05:12+00:00May 3, 2022|Uncategorized|0 Comments

My kinders is bederf

‘n Groot argument teen tuisskool is dat kinders blootstelling moet kry aan tawwe tye. Die uitdagings, swoeg en sweet van skool maak kinders sterker.

Ek moet sê ek bekommer soms dat my kinders erg bederf is. Hulle het ‘n woes lekker lewe! Kom ek wys jou.

Hulle kry soms ontbyt in die bed. Al is dit nie hulle verjaarsdag nie. Hier sommer wafels en roomys vir ontbyt!

My kinders hoef nie vroeg op te staan nie. Hulle gaan slaap tussen 20h00 en 22h00 (hang af van ouderdom) en word wakker tussen 7 en 8uur. Geen jaag nie.

Hulle kies wat hulle wil aantrek en ken nie die verantwoordelikheid van uniform mooi oppas en uitsit vir die volgende dag nie. Ek moes my skoolskoene polish. My girls sal nie weet hoe nie.

My tweeling mag stories kyk en kom eers bietjie later Klaskamer toe.  Hulle werk solank soos wat hulle wil, maar maak gewoonlik so paar werkkaarte klaar. Ek of sussies is naby om te help en verduidelk. En dan gaan speel hulle.

As hulle moeg of nie lekker voel nie, weet ek, en gee genade. Ek weet hoe was hulle nag en hoe vrolik het hulle opgestaan. So ek kan aanapssings maak aan die dag se werk sodat ek net vir hulle lees as hulle energie min is. Ek vra watse letter wil hulle leer? Ek toets sommer deur te vra wat ken hulle al en sien wat moet ek hersien.

Mamma is hulle Juffrou. Hier gooi Nivea dobbelstene en doen haar sommetjies.
Buite werk is ‘n welkom verandering.

Hulle speel so baie! Hulle doen geen huiswerk nie, so as skoolwerkies 11uur klaar is, mag hulle speel! Pouses kan halfuur tot ‘n uur duur. As ek sien hulle speel te lekker, los ek hulle en werk saam my oudste aan iets. Die dag is so aanpasbaar dat ons later verder kan werk of die werk uitstel tot more.

Lentedag tent in die tuin. Hulle speel graag ‘Survivor’.

So, my kinders weet nog nie mooi van sperdatums nie. Daars nie verpligte take nie. Net hier en daar vir drama of kuns (of Spaans vir my oudste) is daar ‘n taak wat hulle by die huis moet voltooi. Dan is dit so nuut en ongewoon dat hulle dadelik aan die werk spring en baie tyd en moeite gee daaraan. Hulle neem so baie trots daarin. Dis dan hul enigste werkies wat hulle vir ‘n ander Juffrou moet inhandig!

En dis hoe dit met eksamens gaan wees. My amper 14-jarige het nog nooit eksamens geskryf nie. So wanneer sy eventueel een moet skryf, gaan dit splinternuut wees! Sy gaan baie ou papiere oefen en seker maak sy dek al die inhoud. Sy gaan studie metodes opswot en baie gereed wil voel. Want sy wil haar bes doen in die nuwe ervaring en die groot toets van haar vermoë. Wel, dis wat ander tuisskool mammas getuig. Dis blykbaar wat met hulle kinders gebeur het.

Ons gaan dikwels met vakansie in die skool kwartaal.

Hier was ons by die see op ‘n Maandag.

My kinders sien ten minste een keer per week hulle beste maatjies. Hierdie week het dit gebeur dat ons by ‘n restaurant sit 10uur die oggend en hulle lek vrugte ysies.

En die ander dae kuier hulle met kinders van alle ouderdomme. Dit hang af van ons planne, naskool aktiwiteite en watse kuiers met nuwe tuisskool gesinne ek reël. So hulle speel maar met kinders wat daar is. Al is dit seuntjies wat 7, 5 en 3 jaar oud is. Of klein kleuters wat hulle meer oppas as mee speel. Of kinders wat nie hulle ouderdom is nie maar hulle vind vinnig goed wat hulle in gemeen het.

Maar my dogters is mekaar se beste maatjies. Hulle kliek so goed! Soms speel die middelkind met die oudste twee en ander kere speel sy met die tweeling. Soms speel die oudste met die tweeling of chat met haar tweede sus tot laat in die nag. Nommer 2 en 3 is baie geheg aan mekaar en gee drukkies na die een by drama of ballet was! En die tweeling is natuurlik mekaar se beste-este vriendin.

Hulle ken mekaar en weet presies wat maak mekaar lag of huil. Wat om te sê as die een kwaad is of hoe om aandag af te trek sodat die tantrum ophou. Hulle baklei ook, maar dis meestal oor dat die een nie genoeg luister of stilbly sodat die ander een kan praat nie. 🤭

Skoolkinders werk vir seker harder as my spul. Ek weet dit vir ‘n feit. As ek sien dat my Graad 5 kind moet sinne oorskryf met kommas by, dan sê ek, sy kan net komma inskryf waar dit hoort. Sy leer steeds oor die doel en plek van ‘n komma. Sy skryf net minder. Ilani en Tenike verkies ook teken as baie skryf, so as hulle eerder die prentjie kan teken, dan doen hulle. Of plaas van spelwoorde 5 keer uitskryf, is een keer genoeg solank hulle dit ken.

Baie van hulle werk, het hulle self gekies. Soms, druk ek hulle om die bladsy klaar te maak of werk te doen wat hulle minder geniet. Maar hulle is nuuskierig oor sekere goed en ek laat hulle dit navors en projek daarvan maak. Hulle werk langer en meer aan hulle gunsteling vakke en korter en minder aan dit wat hulle uitput en nie van hou nie. So ek maak die reëls. En dis altyd ten gunste van hulle.

Is julle al naar van al die bederf? Ek weet dis VET bederf. Ek glo ook te veel van ‘n goeie ding kan sleg wees. Ek moet soms deel met verkeerde gesindhede, ondankbaarheid of onvergenoegheid. Dis dan wanneer ek dink om hulle skool toe te stuur: sodat hulle smaakie kan kry van die ‘regte’ wêreld. Ek kry sulke dae. Ek worstel met sulke gedagtes. En dis nie eers al nie!

Ons het vir Brenda, ons voltydse bediende. So huistakies is minimaal. Hulle help net op naweke met skottelgoed en opruim. Brenda se hulp gee my baie tyd om met hulle te spandeer. Hulle is so gewoond aan my konstante teenwoordigheid dat ek ‘n groot welkom en drukkies kry as ek oor naweke terugkom van die winkels af!  O dit was Maandag toe ek gaan dans het. Het my girls by my man Timothy gelos en was weg vir 2 ure. Toe ek by die huis instap, is daar 5 liefies om my te verwelkom! Was die beste ‘group-hug’ ooit! 😄

So, ek weet nie presies wat gaan die uiteinde wees van al die bederf nie. Ek gaan oor ‘n paar jaar die vrug pluk van hierdie tydperk. Gaan dit vrot vrugte wees? Gaan ek berou oor al die liefde en aandag wat ek hulle gegee het? Wat gaan hulle maak met die vrye teuels wat ek vir hulle gee?

Hulle gaan iemand anders baie kan bederf, dis vir seker. Hulle gaan presies weet hoe!

O, en hierdie is my oudste dogter se stoel. Pappa kry ‘n nuwe een en bring die een huis toe. So sy sit en werk by haar lessenaar op die kantoorstoel. #nogbederf #luuksestoel😋
By |2022-01-04T15:59:14+00:00November 13, 2021|Uncategorized|5 Comments

Wiskunde Speletjies vir 1 Jariges

Ek is mal oor speletjies! Leer terwyl jy speel, dis die beste manier!

Een jariges leer nog taal so mamma en pappa kan die woord ‘Een’ baie herhaal terwyl hulle een vinger wys en een voorwerp.

Hoe klink een klippie of deksel in n houer? En hoe klink sommer baie klippies in n bottel? Kan peutertjie die verskil hoor?

 

Rol n tennisbal heen en weer in n houer. Of sit n klein ronde klippie binne ‘n toiletrol, maak die kant toe en rol ook heen en weer.

Laat kleintjie jou help met die wasgoed! Die EEN kous is loop soek. Waar is sy maatjie?

Sulke kleintjies kan begin om met klei te speel en n slangetjie te rol. Mamma rol n balletjie klei en sê “Een balletjie vir [naam van kleuter].”

 

 

Gebruik die woord EEN in jou opmerkings en geselsies deur die dag. “Daar is een vliegtuig in die lug!” “Jy het een mooi neusie!” en “Wys my” een vinger.”

 

 

 

 

 

 

 

 

 

Pos in die blik. Neem ‘n melkblik en sny n gatjie in die plastiek deksel. Kleinding kan dan roomys stokkies daarin ‘pos’.

Sorteer die teelepels en groot lepels. Peuters leer om te onderskei tussen groot en klein wanneer jy vir hulle teelepels en groot lepels gee en vra dat hulle dit in twee verskillende roomys bakke bêre. Hierdie is wiskunde konsepte!

Daar is baie liedjies en rympies wat jy saam jou 1 jarige kan sing op www.kleuters.co.za Musiek ontwikkel dieselfde area van die brein as wiskunde en daarom is dit so goed vir kleinding as mamma saam hom sing en klap en musiek maak. Laat hom die potte kap met ‘n houtlepel en lekker dromme speel. Hy ontwikkel ritme!

Ek hoop die idees ontkiem nog idees by jou!

By |2022-01-04T16:06:42+00:00August 29, 2021|Uncategorized|0 Comments

Wag met skool

As jy nie ‘n keuse het nie; jy moet werk, daarom gaan jou kind skooltjie toe, is hierdie artikel nie vir jou nie. Ek verstaan dat met vandag se ekonomie, is ‘n een-inkomste huisgesin raar en ‘n groot voorreg. So, ek is nie hier om werkende mammas te laat skuldig voel nie. Dankie vir julle harde werk en bydra! Ons waardeer julle!

Ek praat met mammas wat druk voel vanaf die samelewing om hulle peuters en kleuters in die skool te sit. Ek praat met ouers wie oorweeg om hulle voorskoolse kindertjies te ‘tuisskool’. (Dis nie amptelik tuisskool nie, want die wet vereis eers dat kinders op 7 jaar in die skool moet wees. So voor 7, hoef jy NIEMAND se permissie te hê om jou kind tuis te hou nie.) Maar ons noem dit al tuisskool, want dit word al hoe meer abnormaal om voorskool kinders tuis te hê. Dis reeds baie op neergekyk!

Daar is baie druk op kleuter mammas om hulle kinders in die skool te sit. Sjoe! Ek lees op Bakkiesblad van ‘n ma van’ n 1-jarige wie se gesin haar druk om terug te gaan werk toe. Haar seun moet skooltjie toe gaan volgens hulle. Om maatjies te maak! Jinne ouens! 1 jaar oud! Hulle speel nie met maatjies op daardie ouderdom nie! Lyk dalk vir jou so maar dis parallel speel. Om langs ‘n ander kind te speel is nie sosialisering nie! Shame! Ek hoop die mamma geniet nog haar kindjie tuis vir so lank soos moontlik!

Ander mamma voel druk om haar 5 en 3-jarige seuntjies skool toe stuur. Terwyl sy ‘n pragtige kleuterskool geskep het by hulle huis! Maar kinders moet skool toe om maats te maak en te leer en voor te berei vir groot skool, dis wat ons vertel word.

Ek wil iets radikaals sê: ander kinders sit meer stres op’ n kind in sy vormingsjare as wat dit voordelig is!

Hoekom voel ouers hulle is nie genoeg vir hulle kinders nie? Is mamma alleen nie wat ‘n jong kindjie nodig het nie? Die een ma met wie ek gesels het, moes hoor dat haar seuntjies ook bietjie tyd weg van haar nodig het. Wow! Dis ‘n nuwe siening. Dr James Dobson sal stry. Sy boeke sê, kinders speel parallel tot 4 jaar oud. Dat 6-jariges deur ‘n tweede skeidingsangs gaan wat baie normaal is. Die jaar wat kinders Graad 1 toe gaan, is biologies ook die jaar wat hulle skeidingangs beleef! Arme kinders. Hier is navorsing daaroor as jy meer oor dit wil oplees.

‘Maar kinders moet leer deel en hulle beurt wag en vaardighede wat hulle net by ‘n skool gaan leer’, skree die pro-skool kant. Teen 4 jaar, het meeste kinders ‘n boetie of sussie met wie hulle hulle mamma, hulle kamer en hulle speelgoed moet deel. Daar leer hulle van geduld en onselfsugtig wees. In die veiligheid en bekendheid van hulle eie huis.

Dink aan jou werksomgewing. Daar is vriende en ‘buddies’ maar ook mense wie jou warm onder die kraag maak. Jy kan nie hulle vermy nie want hulle is elke dag daar in julle kantoor. So, jy hanteer opmerkings en sluk kwaad woorde elke dag. Dit skaaf aan jou en jy voel geïrriteerd en kwaad maar kan nie elke dag iets terug sê of skree wat jy sou wou nie. Jy probeer net deur die dag kom, sonder om jou koel te verloor.

Kinders beleef dit ook! En hulle emosies is meer intens en moeilik om te beheer. Daardie kind kyk hulle snaaks aan. Daai een vat haar pop. Juffrou sê sy moet kom storie luister maar sy wil nog eintlik klaar speel waar sy was. Daar is heeltyd ‘n getrek en stamp aan haar, fiesies maar ook emotioneel.

Die kleuters moet badkamer toe gaan wanneer hulle nie wil nie, hulle verf of klei wegpak wanneer Juffrou sê dis tyd; hulle moet in kom van buite af wanneer vir hulle voorgeskryf word. Nie wanneer hulle kies nie. As die sand of die wind hulle pla, wie kan hulle daarvan vertel? Dis nie ‘belangrik’ genoeg om vir een van die volwassenes daar te sê dat hy nie sy beertjie by die huis kon vind nie. So die kind loop rond met die bekommerde hartjie heeldag. En dan vra Juffie dat hy op een been staan so lank soos hy kan. Sy moet gou evalueer.

Hoe weet ek die goed? Want ek was ‘n kleuterskool juffrou gewees. Vir jare voor dit, ‘n assistent juffrou. Pragtige skool. Gawe Juffies. Speelplek wat kinders van kan droom. Ek het my als gegee. Die kinders drukkies en liefies gegee. Die lesse so prettig en interessant gemaak soos moontlik. Ek het gedramatiseer en stories uitgebeeld. Ons het liedjies gesing en speletjies gespeel. Maar ek kan die verskil sien tussen daardie kinders en my eie wat ek nou by die huis hou. Maak nie saak hoe oulik die plek is nie, dis nie tuis nie.

Ons het al gehoor dat kinders stouter is by hulle eie mammas as by ander mense of by die kleuterskool. Hoekom is dit? Want hulle kan ontspan en hulle self wees. Hulle kan tantrums gooi en mamma se aandag eis. Hulle kan kla en moan oor als wat pla. Wat doen hulle by die skool? Hulle hou dit in. Onderdruk daardie gevoelens en dit wat eintlik hulle onstel. Hoeveel ouers hoor hoe soet en goed gaan dit by die skool en dan slat die paw-paw die fan by die huis? Dis nie die ma se skuld nie, dis juis omdat daardie moë, oorgestimuleerde kind nou in hulle eie omgewing is waar hulle mag voel en wees en uithak. Onvoorwaardelike liefde maak dit moontlik. Als wat deur die dag opgebou het, loop nou oor. Al die onderdrukte emosies, borrel op eenslag oor. Hou hulle vas mammas. Sê jy kan sien hulle het ‘n rowwe dag gehad. Sjoe, hulle is baie onsteld. So baie gevoelens ~ dis moeilik om te verwoord wat hulle als pla. Hulle kan nog nie vir jou vertel van die honderde klein goedjies wat hulle deur die loop van die dag onstel het nie.

So, as jy kan mamma of pappa, hou jou kind by die huis. Waar hulle kan slaap tot hulle uitgerus is. Waar hulle rustig self kan aantrek en daardie knopie self vasmaak. Waar hulle saam jou plaatkoekies kan maak en kies wat hulle daarop sit. By die huis kan hulle self besluit waarmee hulle wil speel en hoe lank hulle daarmee wil speel. En toilet toe gaan wanneer hulle blaas vir hulle sê dis nodig. En glipsies maak sonder om skaam te voel. En op mammas se skoot klim wanneer hulle die behoefte kry. En net mamma se mooi, gawe gesig sien. Nie klomp vreemdelinge nie.

Ek sê vir mammas wie se familie hulle slegsê omdat hulle tuisbly met hulle kleuters, “HOU SO AAN!” Jy doen goed! Jou kinders weet nie om vir julle dankie te sê nie, so ek sê vir julle dankie! En vir die pappas wat hulle vrouens ondersteun en voorsien sodat hulle kan tuisbly: DANKIE!! Julle is helde!

Mamma, jy is die heel beste persoon vir jou kind. Jy is sy wêreld! En dis hoe dit hoort!

By |2021-05-01T11:16:37+00:00May 1, 2021|Uncategorized|3 Comments

Wat doen my Graad 7 dogter die jaar? (2021)

Sy moes haar eie doelwitte opstel. En ek help kies watse boeke en kursusse haar sal help om haar doelwitte te bereik.

Ek probeer nie vaskyk in haar een spelfout nie, het dit nie eers vir haar genoem nie. 🙂



Wiskunde: steeds Graad 6 Simply Maths met die plan om so gou moontlik Graad 7 boek toe te gaan. Maar sy sukkel met wiskunde so ons vat dit stadig.



Afrikaans: hierdie pragtige IGSCE Tweede-taal Afrikaans boeke tweedehands gekoop op Homeschool Exchange South Africa (New and 2nd hand educational material)

Ek weet nie of sy Cambridge roete gaan loop nie, maar ek hou van hierdie boek en werk en dink dis nou presies reg vir Janéy.



Engels: Writer’s in Residence vanaf https://cumbooks.co.za/products/gr-4-8-writers-in-residence-vol-1-apprentice-spiral-bound

Janéy hou van skryf, so ek wil haar help ontwikkel daarmee.



Bybel: Proverbs People vanaf https://oikosstore.co.za/product/proverbs-people-book-1/#:~:text=’Proverbs%20People’%20are%20character%20workbooks,children%20of%20around%205%2D10.



Aardrykskunde saam my Wêreldlande aanbieding wat sy as assistent werk met my met my kontak klasse. Lees meer oor hoe julle kan deel kan wees al bly julle nie naby nie. https://kieswetterklaskamer.wordpress.com/whatsapp-klub/



Sy stel belang in Onderwys en droom van Au Pair en met kleuters werk. So ek het haar ingeskryf vir kollege-vlak kursus: Childcare and Early Learning Diploma (baie bo haar vuurmaakplek so ek moet saam lees en verduidelik wat dit beteken maar dis okay. Sy sal daarin groei!) https://www.centreofexcellence.com/shop/childcare-early-learning-diploma-course/



So ek vra haar gereeld om lessies met my tweeling te doen en dan neem ek fotos daarvan. Dit gaan soos haar portfolio van ondervinding wees. Dis voorbereiding vir haar toekoms en dit help my baie! Wen-wen situasie!



Sy leer haarself Spaans op Duolingo.

En een van haar doelwitte is om haar eie kookboek uit te bring! So sy soek resep idees en pas hulle aan en eksperimenteeer, en tik dan die resepteboek op Word. Dis als haar eie inisiatief.



Wat is missing? Wetenskap vakke en Biologie. Maar dis nie waar haar belangstelling lê nie. So ons los dit vir eers. Meskien kom dit later by. Of meskien raak sy nooit daaraan nie. Sy loop in ‘n rigting en ek is trots op haar!

By |2021-01-06T13:28:35+00:00January 6, 2021|kurrikulum, Uncategorized|0 Comments

Hy is Sterk in my Swakheid

Ek vind dat as ek te trots of oor selfversekerd van my eie vermoë raak, kom ek met ‘n harde slag aarde toe direk daarna!

Vanoggend wou ek spog op Bakkiesboek oor die wonderlike tyd wat ek Maandag met my kinders spandeer het. So lekker geTuisskool deur die oggend en dan het ek nog geswem met hulle die middag. Ek het so goed gevoel as mamma. Die mamma wat SO baie tyd met haar kinders spandeer en dit geniet! Ek sou vertel het van ons lekker baljaar in die swembad. Hoekom geniet kinders dit so baie om met Mamma of Pappa te speel? Al 5 my dogters het op my gehang en geskree in my ore. (Ek moes paar keer vra dat die een spesifieke een nie so in my oor moet gil nie.) Ons het bal gespeel en lekker gelag. Ek sou ‘n foto wou neem maar ‘n swembad is nou een plek waar selfies nie werk nie.

Die mooi aanhaling wat ek wou kwoteer was: Tyd wat jy met jou kinders speel, is nooit gemors nie. Aah, so poëties.

Wel, gelukkig het ek dit nie geplaas nie. Maar die skade was gedoen. My hart lê bloot voor die Here. Ek dog ek kry iets mooi reg. Mag mens goed voel oor wat jy regkry? Vir seker! Mag jy spog daaroor op sosiale media? Umm, ek sou nie ‘n reël wou maak nie. God ken elkeen se hart. Ek lief dit as mammas iets great deel sodat ons dit saam hulle kan vier. Dis baie belangrik!

Vandag het ek weer geswem met my kinders. By swemlesse. En die keer was die geskreu en trek aan my net te veel. My senuwees was klaar.

Oppad huis toe, sien ek my 4-jarige tweeling is moeg. Dit was 15h00 maar ek gee nie om nie, ‘n middagslapie sal almal goed doen. Ek speel Enja musiek. Ek shush die ander sussies. Die oë raak swaar en begin toe gaan. Hulle s’n, ek kyk vorentoe en in my truspieëltjie. Soos ons in die motorhuis trek, vlieg die oë weer oop. Julle ken daardie ding van kleinsus is stukkend moeg, maar sy wil niks uitmis nie. Ek probeer vir haar rustig maak en sê ek sal by haar bly in die kar, sy kan maar slaap. Nee, sy wil uit. Maar die kind weet nie waar sy is nie, sy is so moeg. Ek tel haar toe op en lê haar neer op my pragtige mooi dagbed. (Weereens dankie Denell🌷) Dit lyk of sy gaan slaap. Ek gaan trek my nat kostuum uit en is nog halfpad aan met droë klere toe ek kinders hoor swem! Ek hardloop venster toe en sien my moë jongste kind sit op die rand van die swembad met haar vlerkies aan. (Darem het n ousus haar swemvlerkies aangetrek.) Maar ek dag ek bars ‘n aar.  Ek skree vanuit die eerste verdieping venster: WIE HET VIR JULLE GESÊ JULLE MAG SWEM?!

My maggies! Hulle kom nou net van swemlesse af!! Hulle WEET hulle mag nie swem sonder toestemming nie. En boonop die kleintjie ook daar sonder dat iemand my sê. Ek roep dat almal dadelik moet uitklim. Maar of hulle hoor nie of my gesag is verdun as gevolg van die afstand. Hulle splash voort. Ek sug. Die fight is uit my uit.

Ek fantaseer oor alleen uitgaan vanaand. Meskien is die flieks weer oop? Of ek kan alleen sit by n koffie shop. Ek moet net wegkom.

Soms is dit lekker om heeldag by my kinders te wees. Ek dink dit vir al in die oggende as ek hulle gesiggies soen en ons hoef nêrens te gaan nie. Dis so lekker dat ek hulle stemmetjies en gesiggies enige tyd kan hoor. Luister na wat hulle dink. Ek hou daarvan. Hulle persoonlikheid leer ken. Ontdek wat vir elkeen belangrik is. Hoe like  hulle hulle broodjies. Daai een eet tamatie maar nie daai een nie. Sy het van tamatiesous gehou maar dis nou verby.

En dan werk ek daaraan om sekere dinge te verbeter. Minder skermtyd is tans my groot uitdaging. Ek weet van die euwels van te veel. Ek sien dit eerstehands! Die tantrums en bakleiery sodra die TV af is. Die ure se gelukkige popspeel as hulle niks skerms voor hulle gehad het nie.

Wat ek wil sê is, ek het tonne empatie en genade vir ma’s wat hulle kinders seermaak. Ek kom soms baie naby om my pragtige, dierbare, soeteliefies pynlik te lyf te gaan. En ek is ‘n taamlik psigiese gesonde persoon. Ek moet myself inhou. Op my foon gaan.  Chocolate gaan eet.’n Ander sussie vra om te kom help. Wegstap.

Ek, as gesonde, sielsgelukkige mamma, voel soms so kwaad! Wat nog van ‘n depressiewe, eensame, alleen enkelma van 3 of 4 kleintjies?

Waarom vertel ek julle my skandige gevoelens en optredes?

Oor die vers:

Ek huil voor die Here vanaand. Ek het Jou nodig Here. Enige woord van bemoediging vir die moë mamma? En die woorde kom:

Ek het jou lief.

Werp al julle bekommernisse op Hom, want Hy sorg vir julle.
1 PETRUS 5:7 AFR83
https://bible.com/bible/6/1pe.5.7.AFR83

Hy sal al die trane van hulle oë afdroog. Die dood sal daar nie meer wees nie. Ook leed, smart en pyn sal daar nie meer wees nie. Die dinge van vroeër het verbygegaan.”
DIE OPENBARING 21:4 AFR83
https://bible.com/bible/6/rev.21.4.AFR83

Moenie bang wees nie, Ek is by jou, moenie bekommerd wees nie, Ek is jou God. Ek versterk jou, Ek help jou, Ek hou jou vas, met my eie hand red Ek jou.
JESAJA 41:10 AFR83
https://bible.com/bible/6/isa.41.10.AFR83

By |2020-10-28T21:10:35+00:00October 28, 2020|Uncategorized|3 Comments

BANG vir foute maak.

Vraag vanaf ‘n nuwe tuisskool mamma: “Hoe kry mens die bangheid uit n kind om foute te maak? As my kind een fout maak (bv. spelling), dan raak sy so bang, sy wil glad nie aangaan met die werk nie.”

My antwoord: My oudste het ook so gevoel toe ons eers begin tuisskool. Ek moes omtrent 6 maande lank fokus op die sin: ‘Dis okei om foute te maak.’ Ons het n studie gemaak daarvan. Ek het doelbewus vir my kind begin leer dat foute’ n gesonde deel van menswees is. Ek het die volgende gedoen:

  • Ons het gekyk na uitvindings wat ontaard het uit foute. Die boek gelees: Mistakes that Worked  Een prettige voorbeeld is die donut! Die gatjie het per ongeluk in ‘n vetkoek gevorm en kyk hoe word die donut wêreldwyd geniet! 🥯
  • Ons het ook geleer van Bybel karakters wat groot foute gemaak het maar God het hulle steeds gebruik.
  • Vir kopiewerk, het my dogter aanhalings van bekende mense oorgeskryf. Elke kwotasie sê jy kan nie leer sonder om foute te maak nie. Hier is die gratis pakket wat ek gebruik het: https://rockyourhomeschool.net/growth-mindset-copywork-mini-book/
  • ‘Growth Mindset’ is ‘n konsep wat ek oor geleer het toe ek die aanlyn kursus daaroor doen deur Coursera. Die artikels oor die verskil tussen’ Fixed Mindset’ teenoor ‘Growth Mindset’ het my gefassineer! Daar is ‘n manier van dink wat’ n reuse impak op ‘n persoon se lewe kan hê. Dit beïnvloed sukses in die werkplek asook die huwelik. Growth Mindset speel’ n belangrike rol in’ n persoon se persepsie van hulle vermoë en daarom hulle toekoms.
  • Veranderde denke begin by veranderde woorde. Ouers kan hulle kinders help om minder te stres oor hul foute deur om hulle manier van praat eers te verander. Hier is ‘n tabel vanaf Carol Dweck.

* Praat oor die foute wat jy gemaak het en hoe jy daaruit geleer het. Jou voorbeeld is dikwels die magtigste leermeester!

* Ek het vir ‘n ruk opgehou kruisies maak by my dogters se werk. Ek sou net’ n syfer onderstreep of niks merk nie want sy kon nie kruise hanteer nie. Ek het net die fout vir haar uitgewys en haar gehelp verstaan wat sy gemis het.

‘n Wyse tuisskool pappa vra sy kinders na elke dag: watter foute het jy gemaak vandag? En wat het jy daaruit geleer?

My dogter het na baie geduld en liefde en die aanhoudende fokus op foute as ‘n geleentheid vir groei, ‘n nuwe sienswyse aangeleer. Ek is verstom oor hoe kalm sy nou is oor foute en hoeveel keer sy sal aanhou probeer.

Nog hulpbronne:

FANTASTIC FAILURES : True Stories of People who changed the world by falling down. https://ebookreader.digital/Fantastic%20Failures%20True%20Stories%20of%20People%20Who%20Changed%20the%20World%20by%20Falling%20Down%20First

The Ultimate list of free Growth Mindset Printables https://bitsofpositivity.com/the-ultimate-list-of-free-growth-mindset-printables-for-kids-and-adults/

https://fs.blog/2015/03/carol-dweck-mindset/
By |2020-09-29T11:20:14+00:00September 29, 2020|Uncategorized|1 Comment

Leefstyl van Leer

Nóg ‘n kopskuif wat nuwe tuisskolers moet maak is die een van skooltyd tot leefstyl van leer.

Oor die algemeen, gebeur skool tussen 7:30 en 14h00. Dit is waar die leer plaasvind. In die skoolgebou. Huiswerk is blykbaar hersiening, (alhoewel ek weet dit al hoe meer nuwe werk en projekte is wat ouers hulle kinders mee help).

Dus, wanneer ouers begin tuisskool, soek hulle die skedule, die tydstip wanneer watse leerarea aan gewerk gaan word. Hulle vra my: “wat moet my kinders weet?” En “op watter ouderdom moet hy/sy kan…” vul in die res.

Die Departement van Onderwys het ‘n volledige, ingewikkelde Uitkoms tabel vir elke graad. Die jaar se temas en werk wat elke graad moet dek is als daar vir enige ouer om te gaan opswot. Die weke en dae, selfs tydstip wat aan lees en praat en skryf gegee moet word is daar. Hier is die skakel https://www.education.gov.za/Curriculum/CurriculumAssessmentPolicyStatements(CAPS).aspx

Maar wanneer jy begin tuisskool, is jy meeste van die dag, week, maand en jaar saam met jou kinders. Daar hoef nie spesifieke ure van die dag uitgeknip te word vir leer nie. Dit werk natuurlik lekker om roetiene te handhaaf en ietsie van ‘n plan te hê. Maar jy gaan sien die ‘skooldag’ is korter as die hoofstroom skole s’n, of konstant ~ hang af hoe jy daarna kyk.

Dis omdat leer die heeltyd plaasvind. En jy kan jouself instel daartoe. Baie leer vind plaas in ons kar. Ek vertel Bybelstories en die kinders luister graag. Ek vertel wat ek geleer het uit my kinderdae. Foute en lesse. Embarrassing moments, dan lag ons saam. Ons ry verby ‘n Engen petrol trok die ander dag soos hy petrol in die massiewe houers onder die grond by die petrolstasie ingooi. Ek wys die kinders gou in die verbygaan. Hulle is verbaas, het nie dit geweet nie!

Ons bespreek baie keer voëls. My jongste is mal oor voëltjies. Sy wil graag hulle uitwys vir my en dan vra sy die name. Soms ken ek die voël. Gewoonlik nie. Dan trek ons die voëlboek nader.

Ons hoor die geroep van ‘n Visarend en dan soek ons hom en voel verheug as ons drie sien sweef hoog in die lug. Hoe en hoekom sweef sekere voëls? Daar volg’ n bespreking en almal deel die kennis wat hulle het.

Gister by die danslesse, sien ons hoe eet Grys Loeries aan ‘n appel. Daars twee, so ons neem aan een is die wyfie en een die mannetjie. My dogter neem my foon en loop stilletjies nader om’ n foto te neem. Hoe het ek geweet dis Loeries? Toe ons kinders was, was my broers deel van ‘n orkes met die naam ‘Die Loeries’. Hulle het hemde en boeke met die prentjie van ‘n Loerie op. Ons het oppad na hulle blokfluit lesse, Loeries gesien in die omgewing en so het ek geleer hoe lyk die voëls. Maar ek het dubbel seker gemaak met Google dat hierdie wel Grys Loeries was. Daars ook helder groenes so kyk uit vir hulle!

Ilani se foto van ‘n Grys Loerie.

Met goeie toeps kan mens baie leer in die verbygaan. Of opsetlik. Ek soek nog `n goeie een om plante te identifiseer. Die Plant app wat ek gehad het erken net Amerikaanse plante. Maar mens kry die wat jy die plant afneem wat jy oor wonder en dan kom die naam op! Hoe cool is dit?!

Mens kan klasieke musiek luister in die kar of by die huis. Soos Beethoven of Chopin se bekende simfonieë opkom, kan julle gesels oor die komponis. Google as jy nie weet nie.

Ek lees vir my kinders baie stories en dit lei na die wonderlikste gesprekke! Voorlees is so ongelooflik vindingryk! Tog voel dit so passief. So min. Ons glo daar moet bladsye werk wees, wit op swart geskryf, om as leer te kwalifiseer. Dis hoekom daar so min tyd is vir speel of swaai of net dagdroom. Want dit lyk te lui om as skoolwerk te tel.

‘n Leefstyl van leer beteken jy (en jou kinders) kan enige tyd en enige plek iets leer. Ek deel die foto met toestemming. Pappa Jannes sê die perd staan vir ure stil terwyl sy ruiter so sit en lees. Wat ‘n salige prentjie om my punt te bewys!

As mens oop is om te leer, enige tyd, enige plek, leer jy baie en aanhoudend. Soos ‘n spons, slurp jy kennis op orals waar jy gaan. Met vakansie. Op uitstappies. By die winkels. In die kar.

Ons het gaan stap in’ n kwekery die week. My kinders besef mens kan jou eie waterval bou met kunsklippe. Hulle hoor ‘n papegaai en besef dit maak seker nie die stilste troeteldiere nie. Ons kom agter hoe duur hout trellis is en wonder of ons een kan bou uit kratte. 🤔

Blootstelling: een van die groot voorregte om in ons land te woon, is om baie geleenthede te hê vir leer ervarings. Mens kan bessies of aarbeie pluk. Skapies en plaasdiere by plase of opstalle besoek. Antieke by teetuine of markdae of museums aanskou. Koeie melk by melkerye. Wetenskap vertonings sien by universiteite. In grotte loop en berge opklim. Selfs die armoede om ons skep geleentheid vir leer. Nie almal in die wêreld weet van plakkerskampe of straat entrepreneurs nie. Ons kinders word geïnspireer om geld te maak sodat hulle kan gee aan die wie dit nodigste het.

Ek onthou nou van die trip na die hospice die ander dag. Ek het my dogters geneem opsoek na tweedehandse boeke want die biblioteek is nog toe. Daar sien ons allerhande outydse ditjies en datjies. Kantoor fone is reeds vir my kinders vreemd en antiek! Gramafoon plate en kasette! Daar was projeksie masjien en skyfies vir skyfievertoning. Dit was ‘n les in geskiedenis terwyl ons snuffel deur die rakke.

Wat het jy nodig om jou denke tot een van ‘n Leefstyl van Leer te verander?

~ nuuskierigheid

~ oop oë, oop kop

~ jou slimfoon gereed om te soek vir antwoorde.

En ‘n bereidwilligheid om te leer!

By |2020-09-20T12:57:48+00:00September 20, 2020|Uncategorized|0 Comments

As jou dag nie gaan soos jy beplan het nie…

Gister was die loodgieters hier om vir ons ‘n nuwe geyser te installeer. Die ou een het gebars. Ons het bietjie wiskunde tussendeur gedoen. Ek het geweet dit gaan chaos wees. So, daar was reeds genade vir myself oor die ongewone dag.

Maar vandag was daar geen onderbrekings nie. Ons het niks aan nie. Hoef nêrens te gaan nie. Niemand kom kuier nie. Die ideale dag om baie werk gedoen te kry! En het ons? Nee! Ek is nie tevrede met hoe vandag se tuisskool verloop het nie. Hierdie is ‘n joernaal inskrywing om vas te stel wat verkeerd gegaan het en hoe ek dit kan regmaak.

1. Liaseer werk. Orals lê papiere. Papiere van laas week se skryf oefening en Wiskunde werkkaarte en prentjies wat hul geteken het. Ek wil hê my kinders moet leer om hulle werk self te bêre. Ek het gesê dat dit nie moontlik is vir my om almal se werk heeltyd in hul lêrs te bêre nie. Ons moet aanhou liaseer sodat daar rekord is van hulle werk. Hulle sê toe dat hulle nie weet watse lêr is hulle s’n nie. Ek handig toe almal se lêre uit. Dink hulle bêre toe hulle papiere. 🙄

2. Wiskunde. Janéy het 3 breuke werkkaarte gedoen terwyl ek langs haar gesit het. Netjiese werk. 👍 Ilani het 2 lang deel somme gedoen op haar eie. Daar was nog 3 op die bladsy. Net 2 somme! Dis te min! Hulle was wel reg gewees. Sy verstaan die lang deel darem. Hoe kan ek kry dat sy die bladsy voltooi? Sy werk so stadig. Ek weet sy moet net fokus. Dalk haar uitdaag om dit binne 10 minute klaar te doen? Horlosie by haar sit. En kyk of dit help.

Tenike het 4 wiskunde werkkaarte gedoen op haar eie. Laaste een het sy meestal als verkeerd gekry. 🙈 Maar sy wou nie korreksies doen nie. Sy wou haar breek neem, toe sê ek okay.  Ander werkkaarte het sy mooi gedoen en verstaan. Meskien was 4 te veel. As sy moeg raak, maak sy meer foute. Maar sy klink altyd so gretig, dat ek wil aanhou werk gee. Bak brood terwyl die oond warm is! Maar die foute is ‘n demper op haar entoesiasme. Meskien moet ek haar stop. Ek kan sê sy het pragtig gewerk en dis genoeg wiskunde vir die dag.

4. Lees: Net Tenike het vir my vandag gelees. Sy lief om vir my te lees! Ek het Ilani oor en oor geroep! Hoekom het sy nie vir my gelees nie? Haar leesboek lê op haar lessenaar. Dis Z vir Zackie boek. So een wat sy geniet en lekker kan lees… O wag, sy HET vir my gelees! Twee bladsye. Hoekom vergeet ek dit? Ek was op my foon gewees 🙈 Ai! Hoekom het sy so min gelees? Iets het ons onderbreek… Sy hou daarvan om my volle aandag te hê. Ek moet more meer fokus en luister terwyl sy lees.

Janéy wil iets vir my op Rivet lees. Onthou om more haar te herhinner. Sy kan ook die Tower Ponies vir my lees.

5. Toe het Ilani en Janéy ander planne. Ilani wou ‘n video opneem van Romeinse syfers. Sy het toe. Dit was baie mooi verduidelik. In Engels. Dis werk wat sy ken so sy leer dan niks nuut nie. 🤔 Wel mooi gepraat. Soos’ n 6 minute mondeling. Mmm, dis dan nie te sleg nie.

Janéy wou ‘n toneelstuk skryf. Sy het in Engels begin, maar toe sê ek sy moet in Afrikaans skryf. Toe vee sy haar Engelse opskrif uit en dink verder aan gaar storie. Toe ek weer kyk het sy niks geskryf nie. So, ek roep haar om Afrikaans se IGSCE werk te doen. Haar eerste op die vlak ooit. Sy het baie netjies geskryf. Ek moes baie help om die vrae te verduidelik en basies die antwoord vir haar gegee. Ja, ek het seker elke vraag vir haar geantwoord. Eish! Maar sy het nog nooit sulke vrae gesien nie. Begripstoets. Ek het verduidelik van vol sinne antwoord. Toe was sy baie versigtig om elke keer ‘n vol sin te skryf. Dis ver van klaar. Ons moet more daarmee aangaan. Hoe kan ek minder die antwoord gee en meer laat sy self dink? Dalk dink ek te min van haar vermoë. Sou sy die antwoord kon uitpluis? Ek wonder 🤔 Sal more laat sy self lees en antwoord. Kyk of sy kan.

My tweeling het mooi gespeel en prentjies ingekleur. Bietjie op my Reading Eggs app gespeel.

Dis nou 26 Augustus 2020. Die dag na gister se inskrywing. Die dag wat ek gehoop het gaan beter gaan. Maar ai, dit was erger! Ek het op die kinders geskree! My geduld was net te ver gestoot. Toe kook ek oor! 🙈 En dan moet ek huilende kinders troos.

Ilani het skielik gesukkel met die lang deel wat sy gister kon regkry! Ek kon dit nie verstaan nie. Sy vra my iets wat sy gister verstaan het! Ek het dit verloor! Die horlosie langs haar het net aanhou tiek terwyl sy bo in haar kamer gaan huil het. As julle gedink het dit gaan altyd klopdisselboom by ons, nou weet jy, dit doen nie.

En Janéy sukkel so met die breuke werk. Ek sê ons kan dit los en aangaan met ander wiskunde maar sy wil nie bladsye oorslaan nie. Sy wil sistematies deur die wiskunde boek werk. So, ons sukkel deur nog werk waar ek basies vir haar stap vir stap sê wat om te doen. Sy sê sy hoor die woorde wat ek sê maar sy verstaan nie hoekom sy moet doen wat sy doen nie. En hierdie is werk wat ek met Lego en magnete en tabelle wat sy vashou vir haar verduidelik het. Toe vra ek wat wil sy hê moet ek doen. Sy antwoord: “Wag tot ek gereed is. Tot ek dit verstaan.” En watse wiskunde doen ons tot dan, wonder ek.

En my 4-jarige Nivea het getantrum en gehuil. Sy wil hê haar tweeling sussie moet die Pappa wees maar Michaela weier. Nivea sê vir ons almal wat om te doen. Tot waar ek moet parkeer! Of waar ek haar kos moet neersit. En met watse lepel sy wil eet. So as haar sussie nie die Pappa rol wil speel nie, voel ek sy hoef nie. Maar Nivea hou nie op skree daaroor nie. So ek gee haar pak en plak haar neer op ‘n stoel in die badkamer. En maak die deur toe! Om die aanhoudende geskreeu bietjie uit te blok. Totdat my lankmoedige bediende Brenda, haar gaan haal en probeer troos. My hart versag en ek gaan gee haar n drukkie en hoor hoe kan ek help. Sy huil toe oor iets heeltemal anders. En ek kon dit beter maak.

Die einste Nivea kom later na waar ek met Janéy deur haar Afrikaans stoei. Sy bring vir my twee blommetjies. Sy sê as die een dood gaan, is daar nog een vir my. My hart smelt! Ek neem haar op my skoot en vra of sy jammer sê. Sy sê ja. Ek gee haar ‘n drukkie en sy hou my net vas. Ek sê dat dit aaklig was om met haar te raas en in die badkamer toe te maak. Sy sê dat sy gedink het dat ek die deur gesluit het en sy nooit sou kon uitkom nie! ☹️😭 Arme liefie! Ons neem toe die fotos saam en ek verseker haar van my liefde.

Ek is altyd die een wat ander mammas bemoedig om kinders nie te push nie. Ek gee gereeld raad om terug te staan en net boek te lees of asem te skep en die werk te los vir ‘n ander dag. Maar ek neem nie my eie raad nie! Ek wil sekere werk gedoen hê die week. Ek voel ons gaan later vakansie hou en rus en speel. Ek stoot nog my agenda op die kinders en dit het vandag lelik ge’backfire’.

Ek werk nou aan my Home Education Diploma deur The Centre of Excellence. Dis gratis beskikbaar die jaar. Dis ‘n uitstekende aanlyn kursus! Nou lees ek die woorde op my rekenaar skerm: “Eventually, even a child only learning what they want to learn will learn how to add, subtract, multiply and divide by a reasonable age. They will understand fractions, decimals, percentages and ratios through everyday life and practical problems. It doesn’t have to be forced, and in fact, you can’t force someone to learn something. In order for them to really understand it, they have to want to learn it.

My kinders speel nou so lekker met die buurkinders. Al die stoei en huil en druk van die oggend is, gelukkig, vergete. Ek sien uit om elkeen ‘n druk te gee en jammer te sê. Darem kry ons elke dag’ n nuwe kans.

By |2020-08-26T13:11:22+00:00August 26, 2020|Uncategorized|2 Comments
Go to Top