The Good and the Beautiful

Jenny Philips is die stigter en eienares van die pragkurrikulum, The Good and te Beautiful.

Sy het die 3de Desember, ‘n een-dag seminaar kom aanbied hier in Pretoria wat ek, en ongeveer 120 ander tuisskolers, kon bywoon. Ek gaan julle terugvoer gee van dit wat sy met ons gedeel het!

Voorreg om Jenny Phillips te ontmoet het!

Jenny Phillips se menswees is ook goed en mooi. Sy skenk haar hele Engelse asook splinternuwe wiskunde kurrikulum program verniet aan die publiek! Die Language Arts, Maths Level K- 6 en so par ander pragtige pdf’s is verniet op haar webwerf; al kostes is die uitdruk en bind daarvan! https://www.goodandbeautiful.com/free/

En dis mooi boeke hoor! Ek het Level 1- 5 by ‘n ander tuisskool mamma gekoop. (Sy het dit reeds uitgedruk en wou daardie kostes dek.) My hart het begin sing soos ek deur die boeke geblaai het! Die formaat en font is asteties aantreklik. Ek is seker daar is ander tuisskool mamma’s wat ook blaai en oooh en aaaah na die mooi prente en netjiese uiteensetting. Julle kan na video’s kyk waar hulle deur die boeke blaai hier: https://youtu.be/cgNtN8ET0Uo

Die werk lyk nie maklik nie. Onthou, Amerikaners se eerste taal is Engels en die meederheid van hulle het geen ander taal behalwe Engels om op te fokus nie. So, hulle spelling en moeiliksheid graad is meer gevorderd as ons tweetwalige kinders aan gewoond is. Ek sien, byvoorbeeld, dat my 12-jarige saal baatvind by Level 2 se spelling boek! Dalk is dit deur Jenny Phillips ontwerp vir Graad 2 kinders, maar daardie spelwoorde ken my amper Graad 7 kind nog nie. So, ek voel opgewonde dat die kurrikulum my dogters se Engelse standaard gaan verbeter en verhoog!

En dit maak nie vir my saak as dit dalk agter lyk of ons ‘n ruk neem om ‘in te haal’ nie. My Ilani se Afrikaans is heel goed, so ek hou im gedagte dat Engels haar tweede taal is (en dat sy deur die jare self bietjie Suid-Afrikaanse gebaretaal en Hebreeus ook geleer het!) Ons kan nie onsself vergelyk met Amerikaanse kinders nie. Dit maak net sin dat hulle meer gevorderd sal wees in Engels as dit hulle enigste taal is!

Maar ek het nou ‘n resensie gekyk van The Good and the Beautiful (afkorting TGTB) deur ‘n Amerikaanse tuisskool mamma en sy sê sy en baie ander tuisskolers voel dat dit ‘n baie ‘advanced’ kurrikulum is. Sy voel Die Graad 1 is meer gepas vir Graad 2 en die Kindergarten vlak is eintlik Graad 1. Sy het gesê dat haar dogter baie goed kan lees as gevolg van die kurrikulum maar dat haar tweeling seuns meer sukkel met die gevorderde kurrikulum. Sy het die woord ‘robust’ oor en oor gebruik. TGTB is in haar opinie’ ‘n baie ‘robust’ program. Kom ons leer Engels terwyl ons daaroor praat 🙂 Robust= vigorous, powerful, tough

Ek hou van daardie woord. Sy sê dit dek taal em spelling asook kuns met bietjie Aardrykskunde ingegooi. Dis ‘n vol kurrikulum. So ek verstaan as tweede-taal sprekers dit eers later opneem of glad nie kans sien daarvoor nie.

Ek het vroër jare van tuisskool geloer daarna en dele van die handskrif boeke uitgedruk. Ek kon gou agterkom dat my kinders nog nie gereed was daarvoor nie. Ek is opgewonde dat hulle nou is!

Voorbeeld van die boeke

Handskrifboek

Maar terug na daardie dag seminaar met Jenny Phillips.

Sy het vir ons agtergrond gegee oor hoe sy met die kurrikulum begin het. Sy was eers ‘n sangeres. Het meer as ‘n miljoen CD’s verkoop wêreldwyd! (Haar musiek is op Spotify:) Met die gelde, kon sy TGTB begin, en dit verniet vrystel.

Sy het eerlik gedeel dat jare gelede, het haar tiener dogter haar oë vir haar gerol en ‘n swak houding gehad. Jenny ruim haar dogter se kamer een dag op en sien die boek wat sy lees. Haar oë val op ‘n sin wat iets soos: “How could her mother be so stupid?!” Jenny besef daar en dan dat haar dogter nie goeie literatuur lees nie en besluit om iets daaromtrent te doen. Sy soek toe mooi klassieke boeke uit. Boeke met goeie waardes en familie verhoudings wat positief en opbouend is.

Jenny wys vir ons uit dat baie gewilde boeke van vadag, se gesinne baie negatief uitgebeeld word. Die skrywers se poging om relevant te bly veroorsaak swak skryfstyl en tiener houdings en gedrag wat ons nie wil hê ons eie kinders moet na-aap nie.

Sy het ‘n versameling van pragtige, taalryk boeke gesoek en dit op ‘n boeklys gepubliseer. Dit is waar TGTB begin het, met die Booklist: https://goodandbeautifulbooklist.com/

Jenny Phillips het baie vir Charlotte Mason aangehaal, (terwyl sy ons knipoog herhinner dat Mej Mason geen kinders van haar eie gehad het nie.)

“And all the time we have books, books teeming with ideas fresh from the minds of thinkers upon every subject to which we can wish to introduce children.” -Charlotte Mason

Jenny het ‘n lesing gegee oor goeie gewoontes (Good Habits). Sy het vertel dat om ons kinders goeie gewoontes te leer is deel van ons Tuisonderrig. Een gewoonte wat sy voorgestel het, ek ek dringend nodig om aan te werk, is om die kinders te leer om dinge uit die kar te haal soos ons by die huis stop. As jou kinders soos myne is, en lyk my soos Jenny s’n ook, dra hulle goed kar toe en haal dit nooit weer uit nie. En so hoop die goed op in die kar. Wel, dis iets wat my vanaf haar praatjie bybly en nog nie ge-implementeer is hier nie. 🙈

Ek wil graag my notas vir julle hier neertik oor What makes an Effective Teacher?

1. Have an enthusiastic attitude about learning. Attitudes are contagious, make yours worth catching!

* Good teachers find the subject fascinating.

2. Don’t spend time on the wrong things.

* Preparation, lesson planning, researching vs. exercise, sleep, time with spouse, home organization.

* Spend time taking care of your physical and spiritual health. You cannot be a good teacher otherwise.

3. Be consistent. Consistency gives children a sense of security, empowers children, eliminates anxiety and eliminates power struggles.

Progress comes slowly and is often hard to see.

4. Understand the child

– Identify why a child struggles with something.

– Understand how much you can challenge a child.

– Adapt learning to the child’s needs.

5. Lighten up. 🙂

“Power dwells with cheerfulness.” -Ralph Waldo Emerson

Sy het nog baie goeie goed gesê. Wat moet ek als in die artikel insluit en wanneer raak dit te lank om te konsentreer?

O, hierso is nog iets uitstekend. Jenny het ons vertel dat hulle vyfde kind nogals ‘n wilde wragtig is. Sy het gesê: Wild child. Dit was so verfrissend om te hoor hoe ‘n ander tuisskool moeder eerlik deel oor ‘n moeilike kind. Sy het die gehoor gevra wie het ook ‘n uitdagende kind by die huis en daar was so paar hande opgelig en angstige laggies.

Sy het toe punte gelys om strategies te deel met probleme. Sy het gesê mens moet jouself vra: hoekom sukkel hulle nou hiermee? Praat en gesels met jou kind en vra wat is dit wat nou moeilik is. Sy het voorbeelde gegee van sulke gesprekke uit haar eie lewe en gesin. Wat ons lekker laat giggel het, want dit klink so bekend. Orals oor die wêreld, gaan ma’s en kinders deur dieselfde. 😄

Sy beveel die boek ‘The Exolosive Child’ deur Dr Ross Greene aan, vir die met plofbare kinders. Ek moes hierdie aanhaling uit daardie boek vinnig neerskryf voor Jenny na die volgende punt beweeg het.

“Which skill set is more important in the real world? Blind adherence to authority or identifying and articulating one’s concerns and taking others concerns into account.”

Dit was ‘n baie goeie seminaar en ek en die ander ouers het dit vreeslik geniet! Ek waardeer Jenny se eerlikheid. Ek waardeer dat sy pragtige boeke soek en laat skryf en beskikbaar maak in haar kurrikulum. Sy het trekkings gedoen en baie boeke weggegee daai dag. Ek was die gelukkige wenner van hierdie 5 boekies, wat sappig en mooi en leersaam lyk!

Ek het die mooi boeke gewen! Dankie Jesus! En Jenny en Stacey en Elvana!

Oor die jare, wanneer ek luister na Amerikaanse nuusberigte, Focus on the Family radio opnames, of opvoedkundige video’s, is ek altyd beïndruk met hulle woordeskat en hulle foutlose spraak. Hulle um of aah nie. Is dit net ek wat elke keer soek vir die regte woord? Hulle kan seker vlot praat want hulle dink net in een taal!

Maar ek wil my kinders blootstel aan pragtige woorde en uitmuntende Engels. En hierdie kurrikulum gaan dit vir ons doen!

Jenny Phillips tuisskool haar 5 kinders in die VSA en neem hande met ons mamma’s wat hier ook hard werk om ons kinders die beste opvoeding te gee wat ons moontlik kan. Ek los jou met har wyse raad:

Teach your children to sit down and evaluate problems. Keep working on them as problems are not always solved quickly.

Ek en my vriendin Stacey van der Walt.

By |2022-12-21T15:11:35+00:00December 21, 2022|Uncategorized|0 Comments

Ek was Parlement toe!

Ek wil graag so groot en geskiedkundige gebeurtenis opskryf. Ek wil meer rekord hou as net ‘n Facebook post. Hierdie was vir my ‘n groot jaar! Ek het bietjie die politiese ryk betreë.

Charlene Chauvet-Swart het my in Februarie 2022 gevra of ek deel van die Gauteng Vereeniging vir Tuisskolers (Gauteng Association for Homeschooling) se uitvoerende span wil wees.

Aan die een kant, weet ek nie wat dit gaan behels nie. Hoe baie van my tyd gaan dit opneem nie. Kan ek nog iets op my bord nog pas? So, terwyl Charlene gesels, begin ek wonder wat ek gaan sê.

En toe onthou ek iets wat al jare in my hart was aangaande tuisskool: en dit is om met die regering te werk om tuisskool te bevorder. My hart is nie vyandig teenoor ons owerhede nie. Ek glo nie dat hulle ‘n mes in het vir tuisskolers nie. Meskien is ek naïef. Meskien wil ek altyd die beste glo van mense. Maar die Here sal juis daardie eienskap van my gebruik tot sy glorie! Ek dink hulle weet net te min van ons. Ek dink hulle dink net ons wil nie skool toe gaan nie. So ons doen die skoolwerk by die huis.

Ek het hierdie jaar gesien hoe oop sekere mense in die Department van Onderwys is om tuisskool beter te verstaan. Daar was oomblikke die jaar waar hulle regtig geluister het en gehoor het dat tuisskool NIE soos skool werk nie.

Ek het toe ja gesê vir Charlene en daar begin ‘n nuwe avontuur vir my. Eers het ons net af en toe ‘n Zoom vergadering gehou. En toe was daar geleentheid in Mei om te praat met die Gauteng Department van Onderwys se Home Education afdeling. ‘n Span mense wie se werk is om tuisskolers te registreer, besoek en besprekings met ons te hê. Hulle raporteer terug aan die provinsie se Department van Onderwys (DvO). Tydens vergaderings met die afdeling, waar die Pestalozzi Trust altyd teenwoordig is, besef die DvO dat daar meer as net CAPS kurrikulum plaasvind by ons huise. Hulle nooi ons toe om die verskillende metodes van tuisskool aan hulle voor te lê. Ek steek toe my hand op om die Eklektiese tuisskool benadering aan hulle te verduidelik.

Die agenda vir 18 Mei 2022

Die 18de Mei was die geleentheid. Ons het gedink dat ons in persoon na kantore sou gaan in Pretoria of Johannesburg maar toe was die vergadering aanlyn. My ma het oor daardie tydperk gekuier van Engeland en ek vra dat sy my kinders asseblief sal besig hou sodat ek in my kamer my voorlegging kan doen. My ma beplan toe ‘n paar aktiwiteite en ek werk aan my PowerPoint. Manlief wys my die vorige aand hoe om Google Teams te gebruik en hoe om wat op my skerm is te deel terwyl ek praat (screen share).

Tuisskool is vir ouers ook ‘n groot ‘learning curve’. Nes ons kinders nuwe goed leer, leer ons nuwe goed. In die proses, wys ons ons kinders dat ons lewe-lange studente is. 😄

Daar was ‘n voorlegging deur Je’Anna Clemens oor Unschooling of Self-directed Learning soos dit eerder nou genoem word. Dit was uitstekend gewees! Baie akademiese feite en navorsing was gedeel. Self-gedrewe leer is wetenskaplik bewys om ‘n goeie metode van leer te wees. Ek was vasgenael en wens ek het die opname om met julle te deel.

Simoné Billson het daarna gepraat oor Classical Conversations. As julle nog nie weet wat CC behels nie, sal ek julle aanmoedig om Simoné in die nuwe jaar te kontak. Al hoe meer tuisskolers in Suid-Afrika sluit aan by ‘n CC groep in hulle area. Hulle ontmoet een keer per week en gebruik rympies en liedjies om feite te memoriseer (die wat in die Foundations fase is).  Daar is ook goeie onderrig en stories en prettige metodes om nuwe inligting te assimileer. Dis ‘n tuisskool gemeenskap van ouers wat toegewyd is om ‘n klassieke opvoeding aan hul kinders te gee. En die kinders blom!

Ek was volgende aan die beurt en my voorlegging het baie goed gegaan. Hier is ‘n foto net voor ek gepraat het.

18 Mei, Google Teams vergadering met DvO

Indien jy meer oor die Eklektiese benadering wil hoor, kan julle my kontak per epos (janetkieswetter@gmail.com) om my video opname daaroor te koop teen R50. Dis nie die opname van die voorlegging nie, (dit was slegs 30 minute gewees). Dit is ‘n twee ure aanlyn Inligtingsessie oor Eklektiese Tuisskool wat ek in Oktober opgeneem het.

Daar was nog voorleggings en op ‘n ander dag, het Annerine Wenhold die American High School Diploma verduidelik. Al te saam, was daar 8 tuisskool kurrikulum/benaderings aan die groep van DvO verduidelik en ek dink hulle het baie insig gekry.

Een van die bemoedigende sinne wat Mev S Mdunge gesê het, was dat sy besef die registrasie vorms wat tuisskolers moet invul nie een van die benaderings dek nie. Sy sê dalk is dit hoekom baie tuisskolers nie wil registreer nie. Sy besef toe dat die registrasie vorm slegs die Nationale Skool Kurrikulum in ag neem. Dit was vir ons ‘n groot deurbraak. Natuurlik moet sy haar bevindings aan die provinsiale hooggeplaastes oordra en hulle in hulle beurt aan nasionale wetgewers, maar treetjie vir treetjie maak ons vordering.

Ons het later in die jaar saam gewerk aan ‘n brief aan die Department om die BELA Bill teë te staan. Baie van julle het julle eie briewe geskryf en ek het ook. Ons as die Gauteng Association for Homeschooling (GAHS) het baie argumente gelys hoekom ons glo die BELA Bill nie as wet deurgevoer moet word nie. (Die brief is beskikbaar aan ons lede.)

BELA staan vir Basic Education Laws Amendment Bill. Dit gaan oor nuwe wetgewing wat alle skole gaan beïnvloed. Maar ons as tuisskolers stel belang in Section 51 wat oor tuisskool gaan. Pestalozzi Trust verduidelik baie mooi hoe dit ons traak en het die skakel tot die BELA Bill op hul webtuiste sou julle dit wil gaan lees: https://pestalozzi.org/en/bela-in-your-home-part-i/

Na die sluitingsdatum vir die geskrewe voorleggings, het ons gewag en kyk. Toe kom die nuus dat daar mondelinge voorleggings sou wees. Dis ‘n baie goeie teken vir ‘n paar redes: Dit wys dat regering bereid is om te luister na die publiek. Dit wys dat daar genoeg ongelukkigheid en uitroep was teen die Bill. En dit vertraag die hele proses en stel enige verandering in wetgewing uit. Ons wil hê dit moet nie slaag nie, maar indien ons dit nie regkry nie, is uitstel en vertraging daarvan die volgende doel.

Charlene Chauvet-Swart, redakteur van SA Homeschool Beat en voorsitter van GAHS, het aansoek gedoen vir ‘n mondelinge voorlegging en ons kry toe die uitnodiging in November, twee weke voor dit sou plaasvind!

Ek het in spanning geluister na die Pestalozzi Trust se voorlegging. Dit was ‘n uitstekende voorlegging deur Mnr Bouwe van der Eems. Die span wat saam met hom in Parlement was, het elkeen die vrae wat aan hulle gestel was, slim geantwoord. Ek het toe gehoor hoe werk die voorleggings. Hoe mens moet notas maak van al die vrae. Hoe mens die ministers moet aanspreek. Die hele proses het my binnstes laat bewe van opgewondenheid!

Toe ons hoor dat ons Kaapstad toe sal moet gaan om ‘n mondelinge voorlegging te maak, vra ek my man wat dink hy. Dit sal wees wanneer ons in Buffelsbaai is met vakansie. Timothy sê dadelik, sonder huiwer, dat hy vir my ‘n vlugkaartjie sal koop sodat ek van George af Kaap toe kan vlieg. As ek wou, sou hy my help om Parlement toe te gaan. Ek laat weet my span, ek kan gaan!

In die volgende weke, werk ons hard aan die voorlegging. Lalie Moraba is genomineer om die 20 min aanbieding te doen. Sy werk dag en nag saam met Uda de Wet om die bewoording te formuleer. Waarop moet ons fokus? Wat moet in en wat moet uit? Toe ek die toespraak lees, vul my hart met trots en ek wil Amen skree op als wat gesê is. JA! Dis my gevoelens presies! Ja, dis wat ek ook glo! Ja, ja ja!

Ek wil ‘n oomblik skryf oor Uda de Wet. Wat ‘n finominale jong vrou. Sy het baie kennis oor wetgewing en werk al jare in verskillende Vereenigings vir tuisskool. Sy ken die ins-and-outs van politiek. Sy verstaan dinge wat ek nog nie weet bestaan nie. Haar grootste voordeel, in my opinie, is dat sy groot geword het as tuisskoler toe dit nog onwettig was in ons land. Haar ouers moes veg vir die reg om haar tuis te skool. Sy het eerstehandse kennis van tuisskool politiek. Sy ken ook die taal, die lingo, die mense betrokke met wetgewing, en die prosesse wat gevolg moet word. Sy het so hard gewerk om ons te help voorberei vir die voorlegging. So min geslaap! En dit met ‘n 2-jarige en pasgebore baba! Dit is hoekom Uda nie self in Parlement kon wees nie. Maar ek wil hê julle moet weet dat daar mense is soos sy, wat nagte om werk om tuisskolers te help veg vir die reg om ons kinders self te onderrig.

Die dag van die vlug Kaap toe breek aan. My gesin ry my George lughawe toe. Ek het my splinternuwe deftige swart en wit uitrusting in ‘n sak. Ek het ‘n oornag tassie. En soos ek my kinders groet, voel ek opgewonde om uit die ma-rol te beweeg vir 24uur en in die besigheidsvrou rol te stap.

Ons span van 5 ontmoet by die Nuwe Tulbagh Hotel vir die eerste keer in persoon. Ons moet die moontlike vrae wat die kabinet sou vrae bespreek en besluit wie antwoord wat.

Lalie is daar, gereed met haar PowerPoint voorlegging en haar toespraak helder met kleur waar sy sekere goed wil onthou. Sikumbhuzo is ook daar. Die enkelpa van 4 dogters wen dadelik my respek. Ons vrouens sien dadelik dat hy baie geduld en wysheid het om sy dogters emotioneel te ondersteun. Sy taak is om oor enige vrae van registrasie of wetgewing te antwoord.

Tehillah Green is ‘n vriendin en kollega. Haar antwoorde sou fokus op sosiale bykomste, co-ops en leer geleenthede wat tuisskool bied. Sy het persoonlike ervaring van tuisskool asook die foute van die skoolstelsel gesien toe haar kinders in die skool was.

Charlene se uitgangspunt is dat enige togewyde ouer kan tuisskool ongeag hulle kwalifikasies. Want sy fasiliteer haar dogter se leer en haar dogter floreer en vorder jare voor haar portuurgroep!

Ek het lank gewik en weeg waaroor ek sal wil praat as ek die geleentheid sou kry. My suksesverhaal is tog Janéy wat gesukkel het om te leer lees. Sy wat nou op 15 ‘n boekwurm is, kon nie Tippie se vlak 1 boeke lees op 9 jaar ouderdom nie. Maar soos ek voorberei het in die dae voor die 29ste November, voel ek ontevrede oor my antwoorde. My storie is mooi maar ek voel nie dat ek daaroor moet praat nie. Ek tik die Voordele van Tuisskool twee dae voor my vlug en gaan strand toe met my gesin met vrede in my hart. En die Voordele van Tuisskool is toe wat ek geantwoord het, want dis presies wat die Voorsitter, Ms Bongiwe Pricilla Mbinqo-Gigaba, gevra het!

Ons voorlegging en antwoorde is beskikbaar as video opname op ons Facebook blad. Ons het dit regstreeks uitgesaai van binne Parlement. Voorlegging deur Lalie Moraba en antwoorde deur Charlene Chauvet-Swart en Tehillah Green is hier: https://fb.watch/hkL9E8RvHY

Antwoorde deur my en Sikumbhuzo en Tehillah is hier: https://fb.watch/hkLjx54MDV/

Wat ek mee wil afeindig is dat ons spanlede daai aand, in daardie hotel, saam gebid het. Ons het besef dat ons almal die Here dien en liefhet. Ook dat ons toegewyde ouers is wat ons kinders se beste belange so sterk op ons harte dra, dat ons voor ministers sal staan en praat daaroor. Ons het hande vas gehou en saam gebid vir ons aanbieding, vir ons gehoor en vir ons mandaat. Ons weet ons beweeg in God se wil. Tuisskool is ons roeping! En ons sal aanhou opstaan vir die voorreg om te kan tuisskool!

Ons laataand vergadering in die hotel die aand voor Parlement.

Ek op die ikoniese trappe van die Parlement gebou.

Indien julle by die Gauteng Association for Homeschooling wil aansluit, kan julle met liefde so doen (al bly julle nie in Gauteng nie). Dit is verniet en ons heg waarde aan jou insette! Vul eenvouding die vorm in om amptelik ‘n lid te word van die Vereeniging. https://forms.gle/brcrmtinZX3vfHW2A

By |2022-12-10T22:49:37+00:00December 10, 2022|Uncategorized|0 Comments

Wag met skool

As jy nie ‘n keuse het nie; jy moet werk, daarom gaan jou kind skooltjie toe, is hierdie artikel nie vir jou nie. Ek verstaan dat met vandag se ekonomie, is ‘n een-inkomste huisgesin raar en ‘n groot voorreg. So, ek is nie hier om werkende mammas te laat skuldig voel nie. Dankie vir julle harde werk en bydra! Ons waardeer julle!

Ek praat met mammas wat druk voel vanaf die samelewing om hulle peuters en kleuters in die skool te sit. Ek praat met ouers wie oorweeg om hulle voorskoolse kindertjies te ‘tuisskool’. (Dis nie amptelik tuisskool nie, want die wet vereis eers dat kinders op 7 jaar in die skool moet wees. So voor 7, hoef jy NIEMAND se permissie te hê om jou kind tuis te hou nie.) Maar ons noem dit al tuisskool, want dit word al hoe meer abnormaal om voorskool kinders tuis te hê. Dis reeds baie op neergekyk!

Daar is baie druk op kleuter mammas om hulle kinders in die skool te sit. Sjoe! Ek lees op Bakkiesblad van ‘n ma van’ n 1-jarige wie se gesin haar druk om terug te gaan werk toe. Haar seun moet skooltjie toe gaan volgens hulle. Om maatjies te maak! Jinne ouens! 1 jaar oud! Hulle speel nie met maatjies op daardie ouderdom nie! Lyk dalk vir jou so maar dis parallel speel. Om langs ‘n ander kind te speel is nie sosialisering nie! Shame! Ek hoop die mamma geniet nog haar kindjie tuis vir so lank soos moontlik!

Ander mamma voel druk om haar 5 en 3-jarige seuntjies skool toe stuur. Terwyl sy ‘n pragtige kleuterskool geskep het by hulle huis! Maar kinders moet skool toe om maats te maak en te leer en voor te berei vir groot skool, dis wat ons vertel word.

Ek wil iets radikaals sê: ander kinders sit meer stres op’ n kind in sy vormingsjare as wat dit voordelig is!

Hoekom voel ouers hulle is nie genoeg vir hulle kinders nie? Is mamma alleen nie wat ‘n jong kindjie nodig het nie? Die een ma met wie ek gesels het, moes hoor dat haar seuntjies ook bietjie tyd weg van haar nodig het. Wow! Dis ‘n nuwe siening. Dr James Dobson sal stry. Sy boeke sê, kinders speel parallel tot 4 jaar oud. Dat 6-jariges deur ‘n tweede skeidingsangs gaan wat baie normaal is. Die jaar wat kinders Graad 1 toe gaan, is biologies ook die jaar wat hulle skeidingangs beleef! Arme kinders. Hier is navorsing daaroor as jy meer oor dit wil oplees.

‘Maar kinders moet leer deel en hulle beurt wag en vaardighede wat hulle net by ‘n skool gaan leer’, skree die pro-skool kant. Teen 4 jaar, het meeste kinders ‘n boetie of sussie met wie hulle hulle mamma, hulle kamer en hulle speelgoed moet deel. Daar leer hulle van geduld en onselfsugtig wees. In die veiligheid en bekendheid van hulle eie huis.

Dink aan jou werksomgewing. Daar is vriende en ‘buddies’ maar ook mense wie jou warm onder die kraag maak. Jy kan nie hulle vermy nie want hulle is elke dag daar in julle kantoor. So, jy hanteer opmerkings en sluk kwaad woorde elke dag. Dit skaaf aan jou en jy voel geïrriteerd en kwaad maar kan nie elke dag iets terug sê of skree wat jy sou wou nie. Jy probeer net deur die dag kom, sonder om jou koel te verloor.

Kinders beleef dit ook! En hulle emosies is meer intens en moeilik om te beheer. Daardie kind kyk hulle snaaks aan. Daai een vat haar pop. Juffrou sê sy moet kom storie luister maar sy wil nog eintlik klaar speel waar sy was. Daar is heeltyd ‘n getrek en stamp aan haar, fiesies maar ook emotioneel.

Die kleuters moet badkamer toe gaan wanneer hulle nie wil nie, hulle verf of klei wegpak wanneer Juffrou sê dis tyd; hulle moet in kom van buite af wanneer vir hulle voorgeskryf word. Nie wanneer hulle kies nie. As die sand of die wind hulle pla, wie kan hulle daarvan vertel? Dis nie ‘belangrik’ genoeg om vir een van die volwassenes daar te sê dat hy nie sy beertjie by die huis kon vind nie. So die kind loop rond met die bekommerde hartjie heeldag. En dan vra Juffie dat hy op een been staan so lank soos hy kan. Sy moet gou evalueer.

Hoe weet ek die goed? Want ek was ‘n kleuterskool juffrou gewees. Vir jare voor dit, ‘n assistent juffrou. Pragtige skool. Gawe Juffies. Speelplek wat kinders van kan droom. Ek het my als gegee. Die kinders drukkies en liefies gegee. Die lesse so prettig en interessant gemaak soos moontlik. Ek het gedramatiseer en stories uitgebeeld. Ons het liedjies gesing en speletjies gespeel. Maar ek kan die verskil sien tussen daardie kinders en my eie wat ek nou by die huis hou. Maak nie saak hoe oulik die plek is nie, dis nie tuis nie.

Ons het al gehoor dat kinders stouter is by hulle eie mammas as by ander mense of by die kleuterskool. Hoekom is dit? Want hulle kan ontspan en hulle self wees. Hulle kan tantrums gooi en mamma se aandag eis. Hulle kan kla en moan oor als wat pla. Wat doen hulle by die skool? Hulle hou dit in. Onderdruk daardie gevoelens en dit wat eintlik hulle onstel. Hoeveel ouers hoor hoe soet en goed gaan dit by die skool en dan slat die paw-paw die fan by die huis? Dis nie die ma se skuld nie, dis juis omdat daardie moë, oorgestimuleerde kind nou in hulle eie omgewing is waar hulle mag voel en wees en uithak. Onvoorwaardelike liefde maak dit moontlik. Als wat deur die dag opgebou het, loop nou oor. Al die onderdrukte emosies, borrel op eenslag oor. Hou hulle vas mammas. Sê jy kan sien hulle het ‘n rowwe dag gehad. Sjoe, hulle is baie onsteld. So baie gevoelens ~ dis moeilik om te verwoord wat hulle als pla. Hulle kan nog nie vir jou vertel van die honderde klein goedjies wat hulle deur die loop van die dag onstel het nie.

So, as jy kan mamma of pappa, hou jou kind by die huis. Waar hulle kan slaap tot hulle uitgerus is. Waar hulle rustig self kan aantrek en daardie knopie self vasmaak. Waar hulle saam jou plaatkoekies kan maak en kies wat hulle daarop sit. By die huis kan hulle self besluit waarmee hulle wil speel en hoe lank hulle daarmee wil speel. En toilet toe gaan wanneer hulle blaas vir hulle sê dis nodig. En glipsies maak sonder om skaam te voel. En op mammas se skoot klim wanneer hulle die behoefte kry. En net mamma se mooi, gawe gesig sien. Nie klomp vreemdelinge nie.

Ek sê vir mammas wie se familie hulle slegsê omdat hulle tuisbly met hulle kleuters, “HOU SO AAN!” Jy doen goed! Jou kinders weet nie om vir julle dankie te sê nie, so ek sê vir julle dankie! En vir die pappas wat hulle vrouens ondersteun en voorsien sodat hulle kan tuisbly: DANKIE!! Julle is helde!

Mamma, jy is die heel beste persoon vir jou kind. Jy is sy wêreld! En dis hoe dit hoort!

By |2021-05-01T11:16:37+00:00May 1, 2021|Uncategorized|3 Comments

BANG vir foute maak.

Vraag vanaf ‘n nuwe tuisskool mamma: “Hoe kry mens die bangheid uit n kind om foute te maak? As my kind een fout maak (bv. spelling), dan raak sy so bang, sy wil glad nie aangaan met die werk nie.”

My antwoord: My oudste het ook so gevoel toe ons eers begin tuisskool. Ek moes omtrent 6 maande lank fokus op die sin: ‘Dis okei om foute te maak.’ Ons het n studie gemaak daarvan. Ek het doelbewus vir my kind begin leer dat foute’ n gesonde deel van menswees is. Ek het die volgende gedoen:

  • Ons het gekyk na uitvindings wat ontaard het uit foute. Die boek gelees: Mistakes that Worked  Een prettige voorbeeld is die donut! Die gatjie het per ongeluk in ‘n vetkoek gevorm en kyk hoe word die donut wêreldwyd geniet! 🥯
  • Ons het ook geleer van Bybel karakters wat groot foute gemaak het maar God het hulle steeds gebruik.
  • Vir kopiewerk, het my dogter aanhalings van bekende mense oorgeskryf. Elke kwotasie sê jy kan nie leer sonder om foute te maak nie. Hier is die gratis pakket wat ek gebruik het: https://rockyourhomeschool.net/growth-mindset-copywork-mini-book/
  • ‘Growth Mindset’ is ‘n konsep wat ek oor geleer het toe ek die aanlyn kursus daaroor doen deur Coursera. Die artikels oor die verskil tussen’ Fixed Mindset’ teenoor ‘Growth Mindset’ het my gefassineer! Daar is ‘n manier van dink wat’ n reuse impak op ‘n persoon se lewe kan hê. Dit beïnvloed sukses in die werkplek asook die huwelik. Growth Mindset speel’ n belangrike rol in’ n persoon se persepsie van hulle vermoë en daarom hulle toekoms.
  • Veranderde denke begin by veranderde woorde. Ouers kan hulle kinders help om minder te stres oor hul foute deur om hulle manier van praat eers te verander. Hier is ‘n tabel vanaf Carol Dweck.

* Praat oor die foute wat jy gemaak het en hoe jy daaruit geleer het. Jou voorbeeld is dikwels die magtigste leermeester!

* Ek het vir ‘n ruk opgehou kruisies maak by my dogters se werk. Ek sou net’ n syfer onderstreep of niks merk nie want sy kon nie kruise hanteer nie. Ek het net die fout vir haar uitgewys en haar gehelp verstaan wat sy gemis het.

‘n Wyse tuisskool pappa vra sy kinders na elke dag: watter foute het jy gemaak vandag? En wat het jy daaruit geleer?

My dogter het na baie geduld en liefde en die aanhoudende fokus op foute as ‘n geleentheid vir groei, ‘n nuwe sienswyse aangeleer. Ek is verstom oor hoe kalm sy nou is oor foute en hoeveel keer sy sal aanhou probeer.

Nog hulpbronne:

FANTASTIC FAILURES : True Stories of People who changed the world by falling down. https://ebookreader.digital/Fantastic%20Failures%20True%20Stories%20of%20People%20Who%20Changed%20the%20World%20by%20Falling%20Down%20First

The Ultimate list of free Growth Mindset Printables https://bitsofpositivity.com/the-ultimate-list-of-free-growth-mindset-printables-for-kids-and-adults/

https://fs.blog/2015/03/carol-dweck-mindset/
By |2020-09-29T11:20:14+00:00September 29, 2020|Uncategorized|1 Comment

Leefstyl van Leer

Nóg ‘n kopskuif wat nuwe tuisskolers moet maak is die een van skooltyd tot leefstyl van leer.

Oor die algemeen, gebeur skool tussen 7:30 en 14h00. Dit is waar die leer plaasvind. In die skoolgebou. Huiswerk is blykbaar hersiening, (alhoewel ek weet dit al hoe meer nuwe werk en projekte is wat ouers hulle kinders mee help).

Dus, wanneer ouers begin tuisskool, soek hulle die skedule, die tydstip wanneer watse leerarea aan gewerk gaan word. Hulle vra my: “wat moet my kinders weet?” En “op watter ouderdom moet hy/sy kan…” vul in die res.

Die Departement van Onderwys het ‘n volledige, ingewikkelde Uitkoms tabel vir elke graad. Die jaar se temas en werk wat elke graad moet dek is als daar vir enige ouer om te gaan opswot. Die weke en dae, selfs tydstip wat aan lees en praat en skryf gegee moet word is daar. Hier is die skakel https://www.education.gov.za/Curriculum/CurriculumAssessmentPolicyStatements(CAPS).aspx

Maar wanneer jy begin tuisskool, is jy meeste van die dag, week, maand en jaar saam met jou kinders. Daar hoef nie spesifieke ure van die dag uitgeknip te word vir leer nie. Dit werk natuurlik lekker om roetiene te handhaaf en ietsie van ‘n plan te hê. Maar jy gaan sien die ‘skooldag’ is korter as die hoofstroom skole s’n, of konstant ~ hang af hoe jy daarna kyk.

Dis omdat leer die heeltyd plaasvind. En jy kan jouself instel daartoe. Baie leer vind plaas in ons kar. Ek vertel Bybelstories en die kinders luister graag. Ek vertel wat ek geleer het uit my kinderdae. Foute en lesse. Embarrassing moments, dan lag ons saam. Ons ry verby ‘n Engen petrol trok die ander dag soos hy petrol in die massiewe houers onder die grond by die petrolstasie ingooi. Ek wys die kinders gou in die verbygaan. Hulle is verbaas, het nie dit geweet nie!

Ons bespreek baie keer voëls. My jongste is mal oor voëltjies. Sy wil graag hulle uitwys vir my en dan vra sy die name. Soms ken ek die voël. Gewoonlik nie. Dan trek ons die voëlboek nader.

Ons hoor die geroep van ‘n Visarend en dan soek ons hom en voel verheug as ons drie sien sweef hoog in die lug. Hoe en hoekom sweef sekere voëls? Daar volg’ n bespreking en almal deel die kennis wat hulle het.

Gister by die danslesse, sien ons hoe eet Grys Loeries aan ‘n appel. Daars twee, so ons neem aan een is die wyfie en een die mannetjie. My dogter neem my foon en loop stilletjies nader om’ n foto te neem. Hoe het ek geweet dis Loeries? Toe ons kinders was, was my broers deel van ‘n orkes met die naam ‘Die Loeries’. Hulle het hemde en boeke met die prentjie van ‘n Loerie op. Ons het oppad na hulle blokfluit lesse, Loeries gesien in die omgewing en so het ek geleer hoe lyk die voëls. Maar ek het dubbel seker gemaak met Google dat hierdie wel Grys Loeries was. Daars ook helder groenes so kyk uit vir hulle!

Ilani se foto van ‘n Grys Loerie.

Met goeie toeps kan mens baie leer in die verbygaan. Of opsetlik. Ek soek nog `n goeie een om plante te identifiseer. Die Plant app wat ek gehad het erken net Amerikaanse plante. Maar mens kry die wat jy die plant afneem wat jy oor wonder en dan kom die naam op! Hoe cool is dit?!

Mens kan klasieke musiek luister in die kar of by die huis. Soos Beethoven of Chopin se bekende simfonieë opkom, kan julle gesels oor die komponis. Google as jy nie weet nie.

Ek lees vir my kinders baie stories en dit lei na die wonderlikste gesprekke! Voorlees is so ongelooflik vindingryk! Tog voel dit so passief. So min. Ons glo daar moet bladsye werk wees, wit op swart geskryf, om as leer te kwalifiseer. Dis hoekom daar so min tyd is vir speel of swaai of net dagdroom. Want dit lyk te lui om as skoolwerk te tel.

‘n Leefstyl van leer beteken jy (en jou kinders) kan enige tyd en enige plek iets leer. Ek deel die foto met toestemming. Pappa Jannes sê die perd staan vir ure stil terwyl sy ruiter so sit en lees. Wat ‘n salige prentjie om my punt te bewys!

As mens oop is om te leer, enige tyd, enige plek, leer jy baie en aanhoudend. Soos ‘n spons, slurp jy kennis op orals waar jy gaan. Met vakansie. Op uitstappies. By die winkels. In die kar.

Ons het gaan stap in’ n kwekery die week. My kinders besef mens kan jou eie waterval bou met kunsklippe. Hulle hoor ‘n papegaai en besef dit maak seker nie die stilste troeteldiere nie. Ons kom agter hoe duur hout trellis is en wonder of ons een kan bou uit kratte. 🤔

Blootstelling: een van die groot voorregte om in ons land te woon, is om baie geleenthede te hê vir leer ervarings. Mens kan bessies of aarbeie pluk. Skapies en plaasdiere by plase of opstalle besoek. Antieke by teetuine of markdae of museums aanskou. Koeie melk by melkerye. Wetenskap vertonings sien by universiteite. In grotte loop en berge opklim. Selfs die armoede om ons skep geleentheid vir leer. Nie almal in die wêreld weet van plakkerskampe of straat entrepreneurs nie. Ons kinders word geïnspireer om geld te maak sodat hulle kan gee aan die wie dit nodigste het.

Ek onthou nou van die trip na die hospice die ander dag. Ek het my dogters geneem opsoek na tweedehandse boeke want die biblioteek is nog toe. Daar sien ons allerhande outydse ditjies en datjies. Kantoor fone is reeds vir my kinders vreemd en antiek! Gramafoon plate en kasette! Daar was projeksie masjien en skyfies vir skyfievertoning. Dit was ‘n les in geskiedenis terwyl ons snuffel deur die rakke.

Wat het jy nodig om jou denke tot een van ‘n Leefstyl van Leer te verander?

~ nuuskierigheid

~ oop oë, oop kop

~ jou slimfoon gereed om te soek vir antwoorde.

En ‘n bereidwilligheid om te leer!

By |2020-09-20T12:57:48+00:00September 20, 2020|Uncategorized|0 Comments

As jou dag nie gaan soos jy beplan het nie…

Gister was die loodgieters hier om vir ons ‘n nuwe geyser te installeer. Die ou een het gebars. Ons het bietjie wiskunde tussendeur gedoen. Ek het geweet dit gaan chaos wees. So, daar was reeds genade vir myself oor die ongewone dag.

Maar vandag was daar geen onderbrekings nie. Ons het niks aan nie. Hoef nêrens te gaan nie. Niemand kom kuier nie. Die ideale dag om baie werk gedoen te kry! En het ons? Nee! Ek is nie tevrede met hoe vandag se tuisskool verloop het nie. Hierdie is ‘n joernaal inskrywing om vas te stel wat verkeerd gegaan het en hoe ek dit kan regmaak.

1. Liaseer werk. Orals lê papiere. Papiere van laas week se skryf oefening en Wiskunde werkkaarte en prentjies wat hul geteken het. Ek wil hê my kinders moet leer om hulle werk self te bêre. Ek het gesê dat dit nie moontlik is vir my om almal se werk heeltyd in hul lêrs te bêre nie. Ons moet aanhou liaseer sodat daar rekord is van hulle werk. Hulle sê toe dat hulle nie weet watse lêr is hulle s’n nie. Ek handig toe almal se lêre uit. Dink hulle bêre toe hulle papiere. 🙄

2. Wiskunde. Janéy het 3 breuke werkkaarte gedoen terwyl ek langs haar gesit het. Netjiese werk. 👍 Ilani het 2 lang deel somme gedoen op haar eie. Daar was nog 3 op die bladsy. Net 2 somme! Dis te min! Hulle was wel reg gewees. Sy verstaan die lang deel darem. Hoe kan ek kry dat sy die bladsy voltooi? Sy werk so stadig. Ek weet sy moet net fokus. Dalk haar uitdaag om dit binne 10 minute klaar te doen? Horlosie by haar sit. En kyk of dit help.

Tenike het 4 wiskunde werkkaarte gedoen op haar eie. Laaste een het sy meestal als verkeerd gekry. 🙈 Maar sy wou nie korreksies doen nie. Sy wou haar breek neem, toe sê ek okay.  Ander werkkaarte het sy mooi gedoen en verstaan. Meskien was 4 te veel. As sy moeg raak, maak sy meer foute. Maar sy klink altyd so gretig, dat ek wil aanhou werk gee. Bak brood terwyl die oond warm is! Maar die foute is ‘n demper op haar entoesiasme. Meskien moet ek haar stop. Ek kan sê sy het pragtig gewerk en dis genoeg wiskunde vir die dag.

4. Lees: Net Tenike het vir my vandag gelees. Sy lief om vir my te lees! Ek het Ilani oor en oor geroep! Hoekom het sy nie vir my gelees nie? Haar leesboek lê op haar lessenaar. Dis Z vir Zackie boek. So een wat sy geniet en lekker kan lees… O wag, sy HET vir my gelees! Twee bladsye. Hoekom vergeet ek dit? Ek was op my foon gewees 🙈 Ai! Hoekom het sy so min gelees? Iets het ons onderbreek… Sy hou daarvan om my volle aandag te hê. Ek moet more meer fokus en luister terwyl sy lees.

Janéy wil iets vir my op Rivet lees. Onthou om more haar te herhinner. Sy kan ook die Tower Ponies vir my lees.

5. Toe het Ilani en Janéy ander planne. Ilani wou ‘n video opneem van Romeinse syfers. Sy het toe. Dit was baie mooi verduidelik. In Engels. Dis werk wat sy ken so sy leer dan niks nuut nie. 🤔 Wel mooi gepraat. Soos’ n 6 minute mondeling. Mmm, dis dan nie te sleg nie.

Janéy wou ‘n toneelstuk skryf. Sy het in Engels begin, maar toe sê ek sy moet in Afrikaans skryf. Toe vee sy haar Engelse opskrif uit en dink verder aan gaar storie. Toe ek weer kyk het sy niks geskryf nie. So, ek roep haar om Afrikaans se IGSCE werk te doen. Haar eerste op die vlak ooit. Sy het baie netjies geskryf. Ek moes baie help om die vrae te verduidelik en basies die antwoord vir haar gegee. Ja, ek het seker elke vraag vir haar geantwoord. Eish! Maar sy het nog nooit sulke vrae gesien nie. Begripstoets. Ek het verduidelik van vol sinne antwoord. Toe was sy baie versigtig om elke keer ‘n vol sin te skryf. Dis ver van klaar. Ons moet more daarmee aangaan. Hoe kan ek minder die antwoord gee en meer laat sy self dink? Dalk dink ek te min van haar vermoë. Sou sy die antwoord kon uitpluis? Ek wonder 🤔 Sal more laat sy self lees en antwoord. Kyk of sy kan.

My tweeling het mooi gespeel en prentjies ingekleur. Bietjie op my Reading Eggs app gespeel.

Dis nou 26 Augustus 2020. Die dag na gister se inskrywing. Die dag wat ek gehoop het gaan beter gaan. Maar ai, dit was erger! Ek het op die kinders geskree! My geduld was net te ver gestoot. Toe kook ek oor! 🙈 En dan moet ek huilende kinders troos.

Ilani het skielik gesukkel met die lang deel wat sy gister kon regkry! Ek kon dit nie verstaan nie. Sy vra my iets wat sy gister verstaan het! Ek het dit verloor! Die horlosie langs haar het net aanhou tiek terwyl sy bo in haar kamer gaan huil het. As julle gedink het dit gaan altyd klopdisselboom by ons, nou weet jy, dit doen nie.

En Janéy sukkel so met die breuke werk. Ek sê ons kan dit los en aangaan met ander wiskunde maar sy wil nie bladsye oorslaan nie. Sy wil sistematies deur die wiskunde boek werk. So, ons sukkel deur nog werk waar ek basies vir haar stap vir stap sê wat om te doen. Sy sê sy hoor die woorde wat ek sê maar sy verstaan nie hoekom sy moet doen wat sy doen nie. En hierdie is werk wat ek met Lego en magnete en tabelle wat sy vashou vir haar verduidelik het. Toe vra ek wat wil sy hê moet ek doen. Sy antwoord: “Wag tot ek gereed is. Tot ek dit verstaan.” En watse wiskunde doen ons tot dan, wonder ek.

En my 4-jarige Nivea het getantrum en gehuil. Sy wil hê haar tweeling sussie moet die Pappa wees maar Michaela weier. Nivea sê vir ons almal wat om te doen. Tot waar ek moet parkeer! Of waar ek haar kos moet neersit. En met watse lepel sy wil eet. So as haar sussie nie die Pappa rol wil speel nie, voel ek sy hoef nie. Maar Nivea hou nie op skree daaroor nie. So ek gee haar pak en plak haar neer op ‘n stoel in die badkamer. En maak die deur toe! Om die aanhoudende geskreeu bietjie uit te blok. Totdat my lankmoedige bediende Brenda, haar gaan haal en probeer troos. My hart versag en ek gaan gee haar n drukkie en hoor hoe kan ek help. Sy huil toe oor iets heeltemal anders. En ek kon dit beter maak.

Die einste Nivea kom later na waar ek met Janéy deur haar Afrikaans stoei. Sy bring vir my twee blommetjies. Sy sê as die een dood gaan, is daar nog een vir my. My hart smelt! Ek neem haar op my skoot en vra of sy jammer sê. Sy sê ja. Ek gee haar ‘n drukkie en sy hou my net vas. Ek sê dat dit aaklig was om met haar te raas en in die badkamer toe te maak. Sy sê dat sy gedink het dat ek die deur gesluit het en sy nooit sou kon uitkom nie! ☹️😭 Arme liefie! Ons neem toe die fotos saam en ek verseker haar van my liefde.

Ek is altyd die een wat ander mammas bemoedig om kinders nie te push nie. Ek gee gereeld raad om terug te staan en net boek te lees of asem te skep en die werk te los vir ‘n ander dag. Maar ek neem nie my eie raad nie! Ek wil sekere werk gedoen hê die week. Ek voel ons gaan later vakansie hou en rus en speel. Ek stoot nog my agenda op die kinders en dit het vandag lelik ge’backfire’.

Ek werk nou aan my Home Education Diploma deur The Centre of Excellence. Dis gratis beskikbaar die jaar. Dis ‘n uitstekende aanlyn kursus! Nou lees ek die woorde op my rekenaar skerm: “Eventually, even a child only learning what they want to learn will learn how to add, subtract, multiply and divide by a reasonable age. They will understand fractions, decimals, percentages and ratios through everyday life and practical problems. It doesn’t have to be forced, and in fact, you can’t force someone to learn something. In order for them to really understand it, they have to want to learn it.

My kinders speel nou so lekker met die buurkinders. Al die stoei en huil en druk van die oggend is, gelukkig, vergete. Ek sien uit om elkeen ‘n druk te gee en jammer te sê. Darem kry ons elke dag’ n nuwe kans.

By |2020-08-26T13:11:22+00:00August 26, 2020|Uncategorized|2 Comments

My Graad R Benadering

Liewe ouers van kinders wat Graad R gaan tuisskool, ek update die blog ‘Al die Letters van die alfabet’ om vir julle te help!
Ek het in 2014 my eerste en prettigste tuisskool jaar geniet! My oudste was 6 jaar oud en ons het haar uit ‘n goeie privaatskool geneem en besluit om ten minste Graad R die Tuisskool metode te probeer.
Sy het nie al die klankies van die Alfabet geken nie. Ek het gesien dat die skool se pas onsettend vinnig was. Hulle het 2, soms 3 nuwe letters (klankies verwys na hoe mens dit uitspreek: ‘k’ vir kat. Letter is soos dit in die Alfabet gesê word.)
Ek wou ons tyd neem met die aanleer van die klankies en het daarom besluit op die Letter van die Week benadering. Een letter/klankie per week. En soms neem ons twee weke met slegs een klankie. Sodat sy dit mooi sal onthou. Ons bou immers die fondasie vir lees en skoolgenot vir die toekoms. As mens te vinnig vorder, kan dinge vergete gaan en gapings in die leer wees.
(Maar as jou kind super blink is, gaan vir seker vinniger! Moenie hulle terughou nie!) Alle kinders verskil. Leer jou kind ken en vorder volgens hulle unieke vermoë!
Die Jaar se temas is die Letter!
So, ons gaan letter vir letter deur die Alfabet werk en alle ander werkies onder daardie tema plaas. So wiskunde gaan ‘tyd’ saam met die t letter gedoen word. Liniaal werk en lekkers eet (om minus te leer) pas by die l letter. Somme en syfers is s. Meet en mates is m. Baljaar met balonne en beertjies tel pas by B. Jy kan enige ding neem wat met die letter begin en meer daaroor leer. Of dit gebruik om wiskunde te leer.
Dan oefen sy skryf van slegs daardie een letter die hele week lank. Maar eers is lekker, sappige, eetbare souse! Sien my Yummy Alfabet vir skryf idees! En later die week op papier.
As ons bietjie oor die son wil leer of plaas of dinosourusse, kom dit by die toepaslike Letter van die Week.
Sensories
Ek het my bes gedoen om so Sensories as moontlik te wees. Dis tog klein kindertjies met wie jy werk! So betrek AL haar sintuie! Sy moet die klankie kan proe en sien en voel en ruik en vat! Baie kunsflyt wat prettig die fynmotor spiere oefen. Knip en plak en klei en verf vorm altyd deel van ons week.
Hoe benader ek Graad R?
Tuisskool Graad R hoef nie van 8uur tot 12 te wees nie. Ons hoef nie ons kinders so baie besig te hou nie. Onder is daar idees van wat ons elke week vir die letter gedoen het. Ons het taamlik baie gedoen omdat ek baie entoesiasties gevoel het en vol energie was!
My ander kinders was op daardie stadium 4 en 1 jaar oud en kon sommige goed saam doen. Maar meskien is julle gesin nou anderste en moet jy ook baie aandag gee aan ‘n ouer kind of baba. Dan neem asb my raad en doen EEN ding per dag met jou Graad Rtjie. Net een. Dit kan so kort wees soos s in suiker te skryf of so ingewikkeld soos sneeuman te maak met wetenskaplike sneeu. Maar geniet daardie paar oomblikke met jou Graad R kind.
Is dit genoeg? vra jy my. Ja! Want tussen in gaan jou kindjie speel. En self besluit om te teken of in te kleur. En self jou kom vra wat hulle oor wonder. “Hoe spel jy kat?” het my 4 jarige net vanoggend in die kar gevra. Toe ek skryf vir haar (Pappa bestuur) en sy na-aap my woord en skryf kat! Uit haar eie. Omdat sy wil.
Dis hoe Graad R lyk. Jy HOEF nie formele kurrikulum te volg nie. Jy kan net rustig dietjies en datjies doen met jou kind.
In watse volgorde moet ek die Letters van die Alfabet leer?
Die order waarin ons (die Kieswetters) die letters van die alfabet geleer het is nie die order aanbeveel deur onderwysers nie, omdat die letters nie maklik is om te skryf nie.
Die order aanbeveel deur skole is:
i r n m l k h b p c o s a g d q e t f j u y v w x z
Ek het letters gekies sodat my kind vinnig woorde sou kon lees. Eers k vir ons van Kieswetter. Dan a en t sodat sy na drie weke van Graad R ‘kat’ en ‘tak’ kan lees. Verder het ek maar gekies soos ek lus gevoel het. Baie ‘random’. Ek het geen nadeel gesien met ons ‘deurmekaar’ order van leer nie. ‘n Kind moet elk geval elke letter kan lees en skryf op ‘n stadium so maak dit regtig saak in watse order hulle dit leer?
Ek gee dan ons lysie letters met die link na elke blog daaroor.
K-aktiwiteite
Nog K Aktiwiteite
Ons A Aktiwiteite
Ons T Aktiwiteite
Ons Spontane S-week
Ons Goeie Gebaar G-week
Lekker Lag L-week
Here Help ons H-week
Besige Bytjies B-week
Pannekoek-weer P-week
Waterkaskenade W-week
Ellendige Eeyore E-week
Moses Lapbook M-week
Vrolike V-week
Interessante I-week
Nuttige N-week
Ons onderstebo o-week
Raai Raai R-week
Dinosourus D-week
Frenektomie F-week
Ice Ice Baby (y-week)
Uuuuuu, wat begin met U?
Z is vir Zoeloe
Ek het nie C en Q gedoen nie, want werklik, waarvan gaan ons week bestaan? Quiche en collage? (Wat albei eintlik Franse woorde is!) Ook nie x nie.
Ons het ‘n J-week gehad. ‘n Jas wat lekker pas! Kan nie nou presies onthou nie, maar dit was ‘n moeilike week en ons het te min gedoen om dit in ‘n blog post te sit. Dalk sal ek nog behoorlik J week doen. Daar is darem baie goeie J-woorde, soos Jesus en Janéy en Janet! 🙂

By |2014-12-11T08:00:53+00:00December 11, 2014|Uncategorized|0 Comments
Go to Top